Антропологийн тодорхойлолтгүйгээр сурган хүмүүжүүлэх ажил явуулах боломжгүй юм. Хүмүүжил, боловсрол болон нийгэмшлийн салбарт хүний тухай ойлголтыг шууд болон шууд бус утгаар тодорхойлсон байдаг. Хүний тухай шууд болон шууд бус ойлголт нь хүмүүс бид өөрсдийгөө хэрхэн харж ойлгодог, бусад хүмүүстэй болон хүүхдүүдтэй хэрхэн харьцдаг, мөн бидний хувьд сурган хүмүүжүүлэх гол ажил, шилдэг аргачлал нь юу болохыг тодорхойлдог. Хүмүүжүүлэх ажлыг хоёр үндсэн чиг хандлага тодорхойлж байна: Нэг талаас бидний амьдрал глобалчлалын улмаас адилсах буюу нэгэн нийтлэг хэлбэрт орох байдал нөгөө талаас өөр хоорондоо ялгаатай байдал, олон соёлын уламжлал. Энэ хоёр чиг хандлагыг ихэнх тохиолдолд ялгаж салгах боломжгүй. Тэдгээрийн мөн чанар нь эрс тэс хөгжлийн үр дүн юм. Үүний үр дүнд өөр өөр үүсэл гаралтай, олон соёлын элементүүд холилдсон, амьдралын холимог хэв маяг бас бий болдог. Ийм л орчинд бид болон бидний хойч үе амьдарч, сурах болж байна. _Бид 21-р зууны эхэн үеийн хүний хувьд өөрсдийгөө хэн гэж ойлгох вэ? Амьдрал дээр өөрсдийн соёл уламжлалыг глобалчлалын шинэ санаатай хэрхэн холбох вэ?_ Антропологийн эдгээр асуултуудад хариулахад амар хялбар биш. Гэвч амьдралын түвшнийг тодорхойлох чухал ач холбогдолтой эдгээр асуултууд бидэнд амьдралаа төлөвлөж, авч явахад хэрэгтэй. Энэ бүхэн бидний хэл, соёлын төсөөлөл, гэр бүлийн амьдралын үндсэн дээр өрнөдөг.