Энэхүү ном нь физикийн шинжлэх ухааны суурь, хүн бүрийн мэдвэл зохих ойлголтуудыг цогц багтаасан, сонирхолтой, ойлгомжтой хэлбэрээр бичсэн лавлах бичиг юм. Ойлголтуудыг зураг, фото зураг, график, хүснэгт, схем зэргийг ашиглаж, энгийн ойлгомжтой үг хэллэг, амьдрал дээрх жишээгээр тайлбарласан нь уншиж ойлгоход ихээхэн дөхөмтэй. Зөвхөн манай улсын суурь боловсролын мэдлэг чадвар олгох агуулгаар хязгаарлагдахгүй, олон улсын хөтөлбөр сургалтад нийцсэн нь тус лавлах бичгийн давуу тал юм. 

Номын эхний бүлэгт физикийн шинжлэх ухаан юуг судалдаг, бусад шинжлэх ухаантай ямар холбоотой, физикийн үүднээс бодож сэтгэх, ажиллах ямар арга хэлбэрүүд байдаг, физикийн нээлт хийх арга замууд, хууль, загвар, онолууд нь юу болох талаар ерөнхий ойлголт өгнө. 

Дараагийн бүлгүүдэд физикийн салбар ухаануудын үндсэн ойлголтуудыг тодорхойлж, онол, хуулиудыг тайлбарлана. Үүнд: механик, дулаан, цахилгаан, хараазүйн, атомын болон цөмийн физикийн онолууд, байгаль болон техник дэх энергийн салбарууд хамаарна.

Энэхүү номыг:   

• Физикийн шинжлэх ухааныг судалж эхэлж буй ЕБС-ийн дунд ангийн сурагчид сургуулиа төгсөх хүртлээ лавлах болгон ашиглах,   
• ЭЕШ, улсын шалгалт, бие даалтад бэлдэж буй сурагчид мэдлэгээ бататгаж, шалгалтандаа бэлтгэхэд ашиглах,   
• Хүүхдэдээ хичээл хийхэд нь туслах хүсэлтэй ч сургуульд үзсэнээ санахгүй байгаа эцэг эхчүүд мэдлэгээ сэргээхийн тулд ашиглах,   
• Мөн энэ чиглэлийн суурь мэдлэгээ сэргээн бататгах хүсэлтэй хүн бүхэн ашиглах боломжтой.