Монгол улсын хоол үйлдвэрлэлийн салбарын мэргэжилтнүүд болон нарийн хоолонд дурлагсдад дэлхийн стандартыг танилцуулж, соён гэгээрүүлэх зорилгын хүрээнд Монсудар хэвлэлийн газраас “Сонгодог зоогийн нэвтэрхий толь”-ийг монгол хэлнээ албан ёсны зөвшөөрөлтэйгөөр орчуулан гаргалаа. Уг ном нь олон төрлийн зоогийн гарал үүсэл, түүхий эд, түүгээр бэлтгэх дэлхийн улс орны уламжлалт зоог, хоол үйлдвэрлэлийн технологи гээд нийт 4000 орчим нэршлийн дэлгэрэнгүй тайлбартай, 1200 гаруй өнгөт болон хар, цагаан зурагтай, 1448 нүүр бүхий дэлхийн хамгийн том хоол хүнсний нэвтэрхий толь юм. Анх 1938 онд Франц хэлнээ хэвлэгдсэнээс хойших 82 жилийн туршид орчин үеийн шинэлэг технологи, жороор баяжиж шинэчлэгдэхийн сацуу дэлхийн 9 хэлнээ орчуулагдсан. Түүнчлэн сонгодог болон орчин үеийн 2500-аад хоолны жортой агаад эдгээрийн 500 орчмыг дэлхийд алдартай тогооч нар зохиож, өдгөө энэ жорын хоолнууд олон одтой зоогийн газрын хоолны цэсэд оржээ. Жороос гадна тухайн хоол үүссэн түүх, хэнд зориулж хэн зохиосон, нэршлийн гарал үүсэл гэх мэт сонирхолтой мэдээлэлтэйгээс гадна Францын муж, бүс нутгийн нэрийн хоол, дэлхийн улс орнуудын хоолны соёлын тухай онцлон оруулсан байна. Мөн ховор нандин хэдэн зуун нэрийн бүтээгдэхүүн, тухайлбал бяслаг, дарс, махан бүтээгдэхүүн, амттан, талх нарийн боов, зоог гэх мэтийн дэлгэрэнгүй тайлбар болон заримынх нь хийх аргыг дурджээ. Улаан лоолийг хальслах, шоколадтай сүү бэлтгэх, нарийн боовны зуурмаг зуурах, салат хийх, сүмс бэлтгэх, ногоог олон төрлөөр хэрчих гээд эгэл жирийн өрхийн гал тогоонд хийж болох амархнаас авхуулаад ангийн махыг дарсанд жигнэх, малтуу мөөгөөр хачирласан шанзалсан махан царцаамаг бэлтгэх, артишокийн зүрхэвчийг хальслах, далайн хясаа, наймалжийг зөв сонгон авч боловсруулах гэхчлэн нарийн технологиудыг багтаасан тул дэлхий дахинаа мэргэжлийн тогооч нар болоод хоолонд дурлагсдын ширээний ном болжээ.