Монгол эр хүний нэг чимэг, бэл бэнчин, зэрэг зиндааг илтгэдэг зүйл бол хөөрөг билээ. Үнэт чулуун хөөрөг эзнээ гэнэтийн аюул, муу зүйлээс сэргийлж, эр хүнд эрч хүч өгч байдаг ажээ. Үнэтэй, чанартай хөөргийг тэр хэмжээний чамин тансаг торгоор оёсон (даалингийн өнгө хөөрөгний өнгөтэй зохицсон) загасан нуруу ороосон, дөрвөн хүчтэн, 8 тахилтай, шүдэнзний булан хээтэй даалинд хийж хэрэглэдэг. Даалин бол эр хүний эхнэрийг хэр уран оёж шагладагийг, хадам нь бэрийнхээ хэр урныг, нөхөр нь суух хүүхнийхээ үйлэнд хэр зэргийг шалгадаг шалгуур байлаа. Энэ номыг Монголынхоо өв уламжлалыг цааш түгээх, монгол бүсгүй бүхэн ханьдаа, аавдаа, өвөөдөө, ахдаа өөрийн гараар даалин урлаж өгөхөд нь тус нэмэр болох үүднээс анхлан суралцагсдад зориулан бэлтгэжээ.