Ус бол хүн оршин амьдрахад хамгийн чухал хэрэгцээт, бас байгалийн хязгаарлагдмал үндсэн нөөц юм. Байгалийн усны нөөцийг зүй зохистой ашиглах, хамгаалах, хүн амыг чанар сайтай ундны усаар хангах нь манай улсын Үндсэн хуулиар тунхагласан, ард түмний эрүүл, аюулгүй орчинд амьдрах нөхцөлийг бүрдүүлэх гол эх сурвалж билээ. Өнөөдөр зөвхөн Монгол улсад бус дэлхийн хүн амын өсөлт, үйлдвэржилттэй холбоотойгоор байгалийн усны нөөцөд асар их ачаалал үүсээд байна. Үүнээс гарах гарцыг хүн төрөлхтөн хайж, зарим шийдлийг олоод эхэлчихсэн. 'Усны нөөц, хөгжлийн бодлого' ном чухамдаа үүнд л хариулт өгөх бодлогын асуудалд чиглэгдсэн бөгөөд хэн ч гэсэн аливааг танин мэдэхээс эхлэн хайрлах, зөв зохистой хэрэглээний үндэс тавигддагийг бас хэлэх нь зүйтэй. Номын зохиогч 'Усны Ассоциаци' ТББ-ын тэргүүн, доктор Д.Батмөнх энэхүү бүтээлдээ монгол орны усны нөөц, ашиглалт, хэрэглээний талаарх олон жилийн судалгааны үр дүн, хөгжингүй орнуудын усны менежментийн бодлого, төлөвлөлт, өөрийн ажлын туршлага зэргийг үндэслэн усны танин мэдэхүй, бодлого төлөвлөлт, цаашдын зорилтын тухай сүүлийн нэгээс хоёр жилд сонин, сэтгүүлүүдэд өгсөн ярилцлага, өгүүллэг, нийтлэлүүдээ эмхэтгэн оруулсан байна.