Монгол улс, АНУ-ын хооронд дипломат харилцаа тогтоод гучин жил ч болоогүй байгаа нь үнэн боловч Монголыг америк иргэд, америк эрдэмтэд сонирхон судалж эхэлсэн түүх лавтайяа зуун тавь гаруй жилийн өмнөөс эхэлжээ. Өөрөөр хэлбэл улс төрийн хувьд биш юмаа гэхэд судалгаа шинжилгээ, аялал жуулчлал, соёл боловсролын хүрээнд бол бүр XIX зуунаас харилцсаар ирсэн байна. Энэ хугацаанд Монгол улсыг, Монгол хүнийг, Монголын түүх соёл, хэл бичиг, зан заншил, шашин шүтлэг зэргийг АНУ-д таниулж байсан хүмүүс АНУ-ын монгол судлаач эрдэмтэн юм. Тэдний ажил, судалгаа АНУ-даа бол чухалд тооцогддог, цалин мөнгө их хүртдэг, нэр алдарт гаргадаг мэргэжил байсангүй. Гэвч үүнээс нь болж ажил мэргэжлээ, Монголыг сонирхон судлах эрмэлзлээ алдсангүй, харин ч чармайн ажиллаж, Монгол судлалыг АНУ-ын эрдмийн ертөнцөд хүлээн зөвшөөрөгдөх судлагдахуун болгож чаджээ. Тэдгээр эрдэмтдийн тухай өнөөдөр та энэ номоос унших болно.