Уг ном 2011 онд анх хэвлэгдэж байсан бөгөөд энэхүү хоёрдахь хэвлэл нь агуулгын хувьд өөрчлөгдөөгүй боловч мэргэжлийн үг хэллэг, найруулгыг засаж сайжруулсан, нэмэлт материал, бүлгийн асуултууд, тэдгээрийн хариултууд, толь бичиг, хавсралт материалуудыг нэмсэн зэргээрээ ялгаатай юм. Ном нь Газар зүйн Мэдээллийн Системийн (ГМС) анхан болон дунд шатны сургалтад ашиглах зориулалтаар туурвигдсан ба ГМС-ийг шинжлэх ухааны үндэслэлтэй, логик дэс дараалалтай, энгийн, ойлгомжтой байдлаар тайлбарлахыг зорьсон болно. ГМС нь компьютерт суурилсан систем бөгөөд байгалийн болон хүний бүтээсэн юмс үзэгдлийг орон зай-цаг хугацааны хэмжигдэхүүнд судлах боломжийг олгодог. Уг систем нь өгөгдлийн оролт, удирдлага-зохион байгуулалт болон өгөгдлийн гаралт гэсэн ерөнхий дэс дарааллаас бүрдэнэ. ГМС-ийн технологийг хөрс судлал, цаг агаар, уур амьсгал, ус судлал, хөдөө аж ахуй, ой судлал, хот төлөвлөлт, геологи, эрдэс баялаг судлал, газрын кадастр, хүрээлэн буй орчин судлал, нийгэм-эдийн засаг судлал гэх мэт шинжлэх ухааны олон салбарт ашиглаж байна.