Эрх зүйт төр төлөвших урьдач нөхцөл бол тухайн улс оронд шүүх хараат бус, бие даасан байдлаар ажиллах эрх зүйн орчин бүрэлдсэн байх явдал байдаг. Энэ үүднээс Монгол улс шүүх эрх мэдлийн хүрээнд шүүхийн шинэтгэлийн ажлыг эхлүүлж, 2013 онд шүүхийн багц хуулийг баталж эрх зүйн зохицуулалтыг шинэ түвшинд гаргасан. Гэсэн хэдий ч зарим судалгааны байгууллагын судалгаанд шүүгчийн ёс зүй, шүүгчийг сонгон шалгаруулах, шүүгчид нэр дэвшигчийг үнэлэх арга, ажиллагаа хангалтгүй хэрэгжиж байгааг шүүмжилсэн байна. Үүнээс үзвэл шүүхийн багц хуулийг дахин сайжруулан өөрчлөх шаардлага тулгарч байна. Иймд ХБНГУ-д 1961 онд батлагдаж, 1972 онд шинэчлэн найруулагдсан, хамгийн сүүлд 2015 оны 8 сард нэмэлт өөрчлөлт орсон Шүүгчийн тухай хууль 'Deutsches Richtergesetz' болон 1950 онд батлагдаж, 2015 онд нэмэлт өөрчлөлт орсон Шүүгчийн сонгуулийн хуулийг 'Richterwahlgesetz' орчуулж харьцуулан судлах үүд хаалгыг уншигч танаа хүргэж байна.