Жан-Жак-Руссогийн 'Бусармаг явдлыг хараад дуугүй байна гэдэг өөрөө түүнд оролцож байна гэсэн үг' гэсэн алдартай үг бий. Тиймээс Шилэн дансны хуулиар иргэн танд, надад нэгэн адил олгогдсон хяналтын эрхээ эдэлж, Монголын ард түмний сүүлийн хөлсөө дусаан байж олсон мөнгөнөөс татвар авч буй төр, түүнийг зарцуулан захирч буй 6100 гаруй дарга нар 2016 оны нэгдүгээр сарын 1-ний өдрөөс эхлэн таны мөнгийг хэрхэн дур зоргоор үрж зарсныг илтгэсэн 'Шилэн ном' уншигч таны өмнө баримт сэлтээ дэлгэж байна. Шилэн данс хөтөлж буй төсвийн ерөнхийлөн захирагчид дунд үлгэр жишээ авмаар олон байгууллага байна. МИАТ ХК, МХХШТГ ИХШХЕГ АТҮТ зэрэг зөв шударга үйлсээрээ манлайлагчдыг энд онцлон сайшааж байна. Мөн төсвийн мөнгийг зориулалтын бусаар зарцуулсан, албан тушаалаа ашиглан улсын мөнгийг хувьдаа завшин онц их хэмжээний хохирол учруулсан, гаргасан шийдвэрээс нь болж татвар төлөгчдийн мөнгө шамшигдан үгүй болсон, төсвийн мөнгөөр гадаад дотоодод тансаглан аялан зугаалсан үй олон баримт, өрнөсөн үйл явдлыг 'ШИЛЭН ном'-доо багтаалаа. _Зохиогч_