Боловсролын салбарт бүхий л ухамсарт амьдралаа зориулж ирсэн хуучин, шинэ, сайн муу ал иваа бүхнийг өөрийн амьдрал, бие сэтгэлээрээ туулсан ахмад багш нар, нэрт заах аргач, сурган хүмүүжүүлэгчид. Булганы Ренчиндорж, 1-р сургуулийн Гомбосүрэн, Цагаан, Цэрэннадмид, Увсын Гомбожав, Гоь-Алтайн Гомбо, Дундговийн Бизъяабав, Төмер, 33 дугаар сургуулийн Бадамханд, Оюунханд, Завханы Базар, Хөвсгөлийн Бавуу, Нямжав гэх мэт алдар цуут багш нарынхаа арга барил, заах арга зүйн уламжлал, онцлогоос танд сануулах зорилгоор энэхүү товхимолыг тэрлэв. Үүний зэрэгцээгээр орчин үеийн сурган хүмүүжүүлэх зүйн шинэчлэл өөрчлөлт, хөгжил дэвшил, технологийн ололт амжилтаас та бүхэндээ толилуулж байна. Номыг бүтээх явцдаа сурган хүмүүжүүлэх ухааны аугаа их уурхайн сан хөмрөгөөс шүүрдэж, тунгаан шүүсэн, шүтэн биширмээр, эргэн санамаар аргуудыг сэргээж багшлах ажлын гүн гүнзгий ур ухаан, авьяас билгийн өв, гэгээн мэргэн ухаанаас олж хурааж байсан зүйлсээсээ Тантай хуваалцаж байна. Энэ товхимолд бичсэн зүйлс 'Багш гэж хэн бэ?' 'Багш гэж хэн байх ёстой юм бэ?' гэдэг өчүүхэн ухаарлыг Танд хүргэж байна.