Монгол

Нэрт физикч Л.Д.Ландау, Е.М.Лифшиц нар физикийн бүх чиглэлийн агуулгыг багтаасан онолын физикийн цуврал номыг зохиосон бөгөөд энэ цуврал дэлхийн олон хэл дээр орчуулагдан хэвлэгдэж өнөөдөр ч физикчдийн ширээний ном хэвээр байна. Сүүлийн 50 гаруй жилийн хугацаанд энэ цуврал орос хэл дээр 10 орчим удаа дахин хэвлэгджээ. Эдгээр цуврал ном физикийн бүрэн мэдлэгийг математик хэл дээр илэрхийлж цэгцтэйгээр эмхэтгэсэн байдгаараа онцлог давуу талтай.   1970-аад оны үед энэ цуврал номыг хураангуйлан бичиж 'Онолын физикийн товч курс' нэртэйгээр хоёр боть болгон хэвлүүлжээ. Энэхүү ном нь товч курсийн нэгдүгээр ботийн анхдугаар хэвлэлийн хоёрдугаар хэсгийн орчуулга юм.   Уг ном харьцангуйн тусгай онолын үндэслэл, цэнэг ба орны харилцан үйлчлэл, цахилгаан соронзон орон, цахилгаан соронзон долгион, цахилгаан соронзон долгион цацрал зэрэг сэдвүүдийг Гамильтоны зарчимд тулгуурлан голчлон релятив тохиолдолд авч үздэг бөгөөд их дээд сургуулийн суралцагсад, залуу багш, эрдэм шинжилгээний ажилтнуудад зориулагдсан болно.  