Монгол орны байгаль, ургамлан нөмрөг харьцангуй уугуул байдлаар байгаа хэдий ч үйлдвэр аж ахуйн шинэ чиглэл бий болж хот суурин, зам тээврийн сүлжээ эрчимтэй хөгжиж байгаатай уялдан хөрс, ургамал, амьтны аймагт ихээхэн өөрчлөлт гарч байгааг харгалзан байгалийн ургамлан баялгийг нарийвчлан судалж, зохистой ашиглаж, хамгаалах шаардлага зүй ёсоор урган гарч байна. Иймд Хан Хөхийн нурууны зарим ургамлыг таньж тодорхойлох, зөвхөн ахуйн хэрэгцээнд зөв зохистой ашиглах аргачлалыг энэхүү товхимолд толилуулж байна. Судалгааны ажлын үр дүнг Ховд Их сургуулийн Байгалийн шинжлэл, технологийн сургуулийн Биологийн тэнхимийн багш Д.Дарьханд, Хан хөхийн нурууны УТХГН-ийн хамгаалалтын захиргааны дарга Б.Буянцог нар хийж гүйцэтгэсэн болно. Уг бүтээлийг байгаль орчны мэргэжилтэн, байгаль хамгаалах ажилтан, байгаль хамгаалагч, их дээд сургуулийн оюутнууд, биологич, ургамал судлаач, эм зүйч, малчид, ард иргэд болон ургамал сонирхогч хэн бүхэнд зориулж байна.