XX зууны төгсгөл XXI зууны эхэн үеийн Монголын нийгэм төдийгүй үндэсний соёл- утга зохиолын амьдралд нийт олны анхаарлыг татсан, түрүү үед дангаар ноёрхож асан соцреализмын хуучин уламжлалыг эвдэж, айсуй асан ардчилсан хувьсгалын нөлөөгөөр эрин цаг үедээ нийцсэн шинэчлэл хийх үйл хэрэг өрнөсөн билээ. Ялангуяа монгол уран зохиолын ур зүй, уламжлал, уран сайхны сэтгэлгээний хүрээнд томоохон өөрчлөлт хийж шинэ маягийн уран зохиолын суурийг тавьж чадсан билээ. Ингэхдээ барууны модернизм, постмодернизмын туурвил зүйн туршлага, үзэл онолыг гол болгож, мөнхүү Дорно дахины уран зохиолын ай хүрээнд хамаардгийнхаа хувьд монгол уран зохиолын шинэтгэл нь Оросын уран зохиолоор дамжсан Баруун европ хийгээд Америк, Зүүн өмнөд Азийн орнуудын орчин цагийн уран зохиолын хүчтэй нөлөөтэй хамсран орж ирсэн юм. Энэхүү эрс шинэтгэлийн үзэл санааны нөлөөгөөр Монголчууд ба Монголын уран зохиолчдын хуучинсаг хэсэг болон шинэчлэгчдийн дотор өргөн цар хүрээтэй тэмцэл, маргаан мэтгэлцээн ихээр өрнөж, цаашдаа шинэ үзэл, зоримог эрэлхийлэлтэй шинэ залуу уран бүтээлчид өөр өөрийн бичлэг сэтгэлгээнд тохиромжтой янз бүрийн урсгал, чиглэлд хамрагдаж, ингэхдээ чөлөөт үзэл санааны зарчим, сэтгэлгээний олон янзын хэв маяг, туршлагад тулгуурласан өвөрмөц дүр, адармаатай илэрхийлэл-дүрслэлтэй томоохон чиглэлийн үндсийг тавьж чадсан билээ.