Монгол улс түүхэн явцад хэрэглэж ирсэн соёлын өв болох уран бичлэг (калиграф)-ийг сүүлийн үед өргөн хэрэглэдэг болжээ. Он цагийн шалгуураар шалган, тордон боловсруулсаар өнөөдөр “Сонгодог бичиг”-ийн хэмжээнд хүргэсэн байна. Калиграф нь уран нарийн бичлэгээрээ нүд баясгахаас гадна нарийн далд санаа, философи сэтгэлгээг давхар агуулсан байдгаараа онцлогтой. Тиймээс эртний монголчууд ацаг шүдийг тогтуухан бичиж харилцаагаа хүндэлдэг байсан бол заргын бичигт сүүлээ жад маягаар татах, шүдийг арцалдуулах зэргээр санаагаа нарийн илэрхийлдэг байжээ. Түүгээр зогсохгүй түүний сонгодог босоо хэлбэр, чиглэл, үсгийн зурлага, үсэг хоорондын залгамал бүтэц нь бусад үндэстнээс өвөрмөц давтагдашгүй юм.