Монгол

Харолд Лэмбийн энэхүү бүтээлийн онцлог, давуу тал нь Чингис хааны тухай өгүүлсэн бусад бүтээлтэй харьцуулахад тэдгээрт ашиглагдсан ном зохиолд тааралдаж байгаагүй Чингис судлалын чухал, ховор эх сурвалжуудаас олонтоо иш татан баримтаар бичжээ. Мөн XIII зууны үеийн монголчуудын довтолгооныг XX зууны дэлхийн дайнтай зүйрлэж, хамарсан улс орон, хөмөрсөн гай гамшиг, үзүүлсэн хор хохирол, оролцсон цэрэг дайчдын тоогоор сүүлчийнхээ дутуугүй болохыг тэмдэглэсэн нь анхаарал татаж байна. Уртааш Арменаас Солонгос, өргөөш Төвөдөөс Волга мөрөн хүртэлх өргөн уудам нутагт, 50 гаруй үндэстэн ард түмнийг эрхшээлдээ оруулж, өөрийнхөө хүссэнээр захирч явсан ч Чингис хаан аливаад уян хатан, ухаалаг хандаж чаддаг байсныг зохиогч хүлээн зөвшөөрчээ.  