Монгол үндэстний дотор олон арван гайхамшигт эрдэмтэд төрөн гарч байсны нэг нь Очирдарь богд хэмээн алдаршсан Нэйж тойн хутагт юм. Манзушири Далай Богд Нэйж тойн бол Монголын шашин соёлын нэрт зүтгэлтэн, соён гэгээрүүлэгч, их эрдэмтэн, бурханы шашныг дэлгэрүүлэгч, монгол уншлагын гүн нарийн увидас, жүд дамжлагыг уламжлагч их бодьсадва билээ. Энэхүү их Богдын намтарыг Урадын мэргэн гүүш, дуун хөрвүүлэгч Билгүүндалай 1739 онд туурвисан бөгөөд тэр үеэс хойш умрын их Монголын түүх соёл, шашин шүтлэгийн өв уламжлал болсон төдийгүй ард түмний оюуны гэрэлт зул, онцгойлон суралцах үлгэр дуурайл, увдис эрдэм болон өдгөө хүрч иржээ. Энэхүү намтар нь 300-гаад жилийн тэртээ зохиогдсон хэдий ч хэл найруулгын хувьд орчин цагийн хэн хүн уншсан ч ойлгогдохоор утга уран зохиолын өндөр түвшинд бүтээгдсэн хийгээд нөхцөл тийн ялгалыг орчин цагийн монгол хэлний дүрэмд нийцүүлсэнээс бус элдэв засвар хийлгүй уг эхээр нь хүргэж байна.