Монгол улс зах зээлийн эдийн засгийн харилцаанд шилжсэн цаг үеэс эхлэн өмнөх тогтолцооны үед хэрэглэгдэж байсан хөдөлмөрийн хөлсний систем алдагдан үйлдвэр аж ахуйн газруудын эзэд өөрийн үзэмжээр цалин хөлсний асуудлыг шийдвэрлэж байгаа нь түүний шинжлэх ухааны үндэслэлийг алдагдуулж ажилчдын эрх ашиг зөрчигдөх, бүтээмжийг бууруулах, хөдөлмөрийн зах зээлд хомсдол үүсэх шалтгаан болж байгаа билээ. Хөдөлмөрийн зах зээлийн харилцаанд оролцож буй хэн ч хийж буй ажилдаа сэтгэл хангалуун байхаас гадна авч буй цалин хөлс нь амьдрал ахуйд хүрэлцэхүйц байх ёстой. Өнөөдөр цалин хөлсний талаар тулгамдаж буй асуудлуудын нэг нь ажилчдын идэвхи санаачлагыг хөхиүлэн дэмжсэн, тэдний хөдөлмөрийн үр дүнг шударгаар үнэлсэн хөдөлмөрийн хөлсний системийг бий болгож, мөрдүүлэх явдал юм. Энэ номд цалин хөлсний тогтмол болон хувьсах хэсгийг оновчтой тогтооход чиглэгдсэн олон асуудлыг хөндсөн зөвлөмжүүд байгаа нь цалин, урамшууллын талаар тулгамдаж байгаа практикийн шинжтэй олон асуудлыг шийдвэрлэхэд тань хувь нэмэр оруулна гэдэгт найдаж байна.