Л.Гаваа бол нийгмийн зөрчил тэмцлийн ярвигтай хүнд үед төрж өсөөд, урлагийг бишрэн шүтэгч зураач, багш хүний ачаар боловсорч, орчин үеийн монголын театр, кино, дүрслэх урлагийн бүхий л төрөлтэй амьдрал, уран бүтээлээ хэлхэн холбосон суу билигт зураач билээ. Зураач Л.Гаваагийн уран бүтээлийн алтан сан хөмрөгт Тайз дэлгэцийн засал чимэглэлийн урлаг, Уран зураг, Зураасан зураг, Гоёл чимэглэлийн урлаг, Судалгаа шинжилгээ, Тэмдэглэл, Гар бичмэл, Ном судар зэрэг цаглашгүй их өв хурсан нь түүний гайхалтай хөдөлмөрч, бүтээлч сэхээтэн байсны илрэл юм.