Ардчилал, зах зээлийн эдийн засагт шилжих үйл явц XX зууны төгсгөл үеийн манай орны нийгмийн тогтолцоог тухайлбал, Монголчуудын улс төр, эдийн засаг, нийгмийн харилцаа, амьдралын итгэл үнэмшил үнэт зүйлс хийгээд сэтгэл зүйн тогтсон загварыг бүхэлд нь өөрчлөн шинэчилсэн юм. Асар хурдтай өрнөсөн хотжих үйл явц хөдөө орон нутгаас Улаанбаатар, Эрдэнэт, Дархан хотыг чиглэсэн шилжих хөдөлгөөн болон өмч хөрөнгө, үзэл бодлын олон ургальч байдлын тархалт, эдүгээжилтийн давалгаа монголын нийгмийн дүр төрхийг эрс өөрчиллөө. Энэхүү өөрчлөлт монголчуудын дийлэнх олонхийн амьдралын хэв маягийн үндэс болох мал аж ахуй, нүүдлийн соёл иргэншлийг ихээр хөндсөний зэрэгцээ хотжих үйл явц, даяаршил, бүс нутгийн хүчтэй нөлөөллийн дор суури иргэншлийн өвөрмөц хэв шинж бүрэлдэн тогтож байна.