Түүхийн тулгуур сурвалжуудад Монгол төрийн тогтолцоо, нүүдэлчдийн нийгмийн байгуулал, малч ахуй, өдөр тутмын аж төрөх ёсонд нэвт шингээстэй 'Тэнгэр' хэмээх дээд эрхт, цор ганц шүтээний тухай тодорхой дурдсан нь олон юм. Тиймээс бид энэ удаа монголчуудын уугуул ёс суртахууны сургаалын нэгэн чухал үндэс 'Тэнгэр' хэмээх 'цор ганц, дээд эрхт, бүх газар оршиж, бүхнийг мэдэн болгоогч, ивээн хүч өгч тэтгэхийн зэрэгцээ эс таалан цээрлэл үзүүлэгч дээд хүчин'-д холбогдох судалгааг өөрсдийн харсан үзсэний хэрээр хийв. Тэнгэр, Тэнгэрийн үзэл, Тэнгэрээс заяат хааны үзэл санаатай холбогдох судалгааг зарим эрдэмтэд хийсэн боловч тус сэдвийн хүрээнд багтах олон чухал асуудал судлагдаагүй байна. Тиймээс тус сэдвүүдийг оюутан залуус, залуу судлаачдын сонирхолд хүргэхийг зорьж өөрсдийн багахан судалгааг эмхтгэн хэвлүүллээ.