Монгол

<p>Мал аж ахуй нь монгол улсын эдийн засгийн нэг суурь, хөнгөн аж үйлдвэрийн гол тулгуур, хүн амын хүнсний хангамжийн шавхагдашгүй эх булаг юм. Бэлчээрийн мал аж ахуйн хөгжлийн түүхэн замнал, хэдэн зууны тэртээгээс өртөөлөн ирсэн мал маллагааны уламжлалт арга ажиллагаа, монголын байгаль цаг уурт гойд дасан зохицсон мал сүргийн биологи, ашиг шим, аж ахуйн үнэт чанар, малын гаралтай түүхий эд боловсруулалт, бүтээгдэхүүн үйлдвэрлэлийн үндэсний технологи, онцлогийг манай эрдэмтэн, судлаачид олон жилийн шинжилгээ судалгаанд тулгуурлан хорин боть цуврал болгон туурвиж байгаа нь эдийн засаг, нийгэм, соёлын төдийгүй шинжлэх ухаан танин мэдэхүй, онол үйлдвэрлэлийн онцгой ач холбогдолтой эрдэм мэдлэг, оюун ухааны үнэт бүтээл болжээ. Энэ цувралд монгол мал, түүний ноос, ноосны шинж чанар, эсгий хийх, хонины ноосон бүтээгдэхүүний чанарыг дээшлүүлэх үндсэн арга замууд, эсгий хийх уламжлалт технологи, эсгий, ширмэлийн урлаг, монгол хувцас, гоёл зүүсгэл урлах эрдэм, арьс шир ноосон урлал, монгол эсгий ширмэлийн хээ угалз, эсгий ширмэлийн сургалт, үйлдвэрлэлийн талаар дэлгэрэнгүй бичжээ.</p>