З.Жадамба 1944 онд Хөвсгөл аймгийн Шинэ-Идэр сумын нутаг Цэцэрлэг гэдэг газар төрсөн. Англи, Чехословак, Энэтхэг, Америк улсад суралцаж олон улсын халдвар судлал, эрүүлийг хамгаалахын зохион байгуулагчийн нарийн мэргэжил эзэмшсэн. Хүний их эмч, МУ-ын Эрүүлийг Хамгаалахын Тэргүүний Ажилтан. АНУ-ын намтар судлалын хүрээлэнгийн 2000 оны Мянганы алтан медалийн шагналт З.Жадамба ДЭМБ- ын Зүүн өмнөд азийн бүсийн халдварт бус өвчин, нийгмийн өөрчлөлтийн асуудал эрхэлсэн захирлаар он удаан жил ажиллаж, гадаад дотоодын ном хэвлэлд 80 гаруй бүтээлээ хэвлүүлсэн яруу найрагч, орчуулагч, буддын гүн ухаан судлаач хүн юм. Түүний 'Шатар заалгахгүй Монгол' шүлэг найраглалын түүвэр, 'Бурхан ухааны дээжис' зохиол, Дармапада буюу Буддын ухаарлын зам хэмээх англи хэлнээс шүлэглэн буулгасан орчуулга, 'Хэлтгий тавилан' роман зэрэг хэд хэдэн бүтээл нь зон олны талархлыг хүлээсэн ухаарал, гэгээрлийн гэрэл гэгээ бүхий үнэ цэнтэй бүтээл болсон юм. 'Үүлэн хорвоо' шүлгийн түүврийг нь төрийн соёрхолт яруу найрагч Б.Лхагвасүрэн '...бие ухааныхаа дээж сэтгэлгээг хүмүүний төлөө өргөсөн 'Сүүдэргүй зул' хэмээн нэрийдмээр байна.' хэмээн үнэлжээ.