Яруу найргийг бид хэрхэн төсөөлдөг вэ (?) ... Төсөөллийн манан дунд нэгэн хөх өнгөтэй горхи урсан, хөх шувуу дүүлэн нисч, хөх өнгөт туяа гялбуулсан бүсгүй усны өмнө нүцгэлэн, хөх үзгээр бичигдсэн үнэнлэг долгион үнэний тухай өгүүлнэ. Магад сэтгэлийн хөг эгшиг энд уянгалж, маргааш биш өнөөдрийн үүслийн тухай... хүмүүний тухай... бодролын өнгө гэрэл хурц тодоор гялбана. “Аматти” бол бүсгүй хүний гоо үзэсгэлэнгийн дотоод учир шалтгаан, хөх өнгөт гоо биеийн туяа нь амьдралын зураасанд огтлолцон буй бүхний учир шалтгаан болон гэрэлтэнэ. Хэрвээ бид мананг сөрөн алхахдаа гайхамшигт аялгууг мэдэрч... үнэнийг ухаарч чадваас “Аматти”-д хүрнэ. Энэхүү яруу найргийн түүвэр нь загвар хэв маягт баригдаагүй, орчин үеийн оюун ухааны, сэтгэлгээний яруу найргийн урсгал чиглэлээр бичигдсэнээрээ төдийгүй яруу найргийн хос цомогтой гарч байгаагаараа онцлог уран бүтээл болсон байна. Аматти яруу найргийн ном болон яруу найргийн цомог нь нийт 123 шүлгийг багтаасан ба МУСГЗ, Ардын уран зохиолч Пунцагийн Бадарч Ариутган шүүж, МУСГЗ, зохиолч Г.Аюурзана Өмнөх үгийг нь бичжээ. Яруу найргийг МУСТА, жүжигчин Дугаржавын Батцэцэг, МУСТА, жүжигчин Намсрайн Ялалт амьдруулан уншсан байна.