Аливаа улс оронд түүний анхдагч нэгж болсон гэр бүлээс авахуулаад нийгэм, соёл, улс төр, эдийн засгийн бүхий л хүрээнд эмэгтэйчүүдийн гүйцэтгэх үүрэг асар их байдаг тул тэднийг хөгжүүлэх, улс орны хөгжилд гүйцэтгэх үүргийг дээшлүүлэх үүднээс эмэгтэйчүүдийн өөрсдийнх нь байгууллага ажиллах нийгмийн шаардлагын дагуу Монголын эмэгтэйчүүдийн холбоо 1924 онд анх бий болсноос хойш багагүй хугацаа өнгөрчээ. Монголын эмэгтэйчүүдийн ууган байгууллагын түүх нь хувь заяаны гэгээн учралаар энэ байгууллагыг байгуулж, удирдаж, уламжлан хөгжүүлсэн манлайлагчдын түүчээтэй салшгүй холбоотойн зэрэгцээ тэдгээр манлайлагч эмэгтэйчүүдийн хувь амьдрал ч нийгмийн тухайн цаг үеийн хөгжлийн түвшин, нийгэм улс төрийн амьдралын илэрхийлэл болсон энэ байгууллагын соёлтой холбоотой явж иржээ. Түүх гэдэг бол түүхэн хүмүүсийн намтар гэлцдэг. Тус байгууллагын үе үеийн удирдлагуудын намтар түүхийг судалж, ном бүтээсэн нь ийнхүү та бүхний гарт очиж байна. Эмэгтэйчүүд бидний ууган байгууллагын түүх'Үүсгэлийг үргэлжлүүлбэл хөгжил болно' гэсэн эцэг өвгөдийн сургаалийн дагуу гуйвшгүй үнэн байж, үе үеийн охид бүсгүйчүүд, эхчүүдэд буян хишгээ түгээх болтугай.