Монгол Улсын Хөдөлмөрийн баатар, Төрийн шагналт, Ардын уран зохиолч Дэндэвийн Пүрэвдоржийн мэндэлсний 85 жилийн ойд зориулан түүний яруу найргийн түүврийг эмхэтгэн уншигч олондоо өргөн барьж байна. Д.Пүрэвдорж нэгэнтээ “Монголын яруу найргийг Дашзэвгийн Сэнгээ үнэн амьдрал руу, Б.Явуухулан уянга руу, Б.Лхагвасүрэн ухаарал руу оруулсан” гэж хэлсэн байдаг. Энэ дундуур өөрийг нь урлах руу гэж нэммээр санагдана. Энэ найрагч шиг цэцэн билэгтэй үгийн чөмгөнд урлаж бичдэг зохиолч Монголын уран зохиолын түүхэнд хорьдугаар зуунд гараагүй гэхэд нэг их хилсдэхгүй биз ээ.