Үнэнийг хэлэхэд, үүнээс өмнө 'Эверест гэдэг бол жирийн хүмүүс бид хүршгүй ангид ертөнц. Зам нь хол, үнэ нь өндөр. Тийшээ зөвхөн цөөн хэдэн тусгай уулчид л явдаг.' хэмээн бодож, итгэдэг байсныг нуух юун. Тиймээс над шиг иймэрхүү ташаа мэдээлэл, буруу ойлголттой байсны улмаас хүсэл, мөрөөдөл, тэмүүлэл нь бүдгэрэх, бүр унтрахвий гэдгээс ууланд дуртай хэн бүхнийг сэрэмжлүүлэх зорилгоор Эверестийн үндсэн отог хүртэл өөрийн хийсэн аяллын тэмдэглэлүүдээр бодит мэдээлэл өгөхийн зэрэгцээ бусад өндөр уулс, оргилуудын талаарх танилцуулга мэдээллийг танин мэдэхүйн үүднээс ийнхүү эмхэтгэсэн болно. Хүний амьдрал бол тасралтгүй оргил өөд өгссөн жим мэт үргэлжид ялалт ялагдал ба баяр хөөр харуусал гуниг дүүрэн харгуй билээ. Бид тэрхүү жимээр хэдэн арван жил өгсөн уруудаж явсаар өөр өөрсдийн оргилд хүрч алдар нэрээ мөнхлөөд амар амгаланг олохоор оддог. Энэ номд дурьдагдаж буй эх дэлхийн өндөр оргил 8850 'далайн түвшнээс' метр өндөрт оршдог. Харин таны зорьж буй оргил хэр хэмжээтэйг таниас өөр хэн ч мэдэхгүй билээ.