Бидний өнөөгийн ертөнц мэдээллийг эрж хайж, олох тал дээр урьд урьдын үеийнхэнтэй харьцуулшгүй өргөн боломжийг бидэнд олгосоор байгаа бөгөөд техник технологи хөгжиж, нийгэмд гарч буй сэтгэлгээний болоод үзэл баримтлалын олон талт чиг хандлагуудаас үүдээд байгалийн болоод хумүүнлэгийн шинжлэх ухаануудад ч шинэ ойлголтууд нэмэгдсээр байгаа билээ. Дүрслэх урлаг, дизайн технологийн салбарт ч XX зууны сүүлийн хагасаас орчин үеийн урлаг тулхүү хөгжсөн агаад энэ суурин дээр өсч хүмүүжсэн бидэнд энгийн цаасан дээр зурсан график дүрслэл, инстолляци, видео арт зэргээс эхлээд сүүлийн үеийн техник технологиор бүтээгдсэн зураглалууд, виртуаль кино ч тэр бүр цоо шинэ санагдахаа больжээ. Хэдийгээр шинэ технологи чухал ч оюуны бүтээлд хамгийн чухал нь бүтээлч сэтгэлгээ, санаа, мэдрэмж байдаг. Дизайнер болохоор шийдэж, мэргэжлээ сонгосон хэн боловч үндсэн суурь мэдлэг болох зохиомжийн элементүүд, зарчмуудыг судлах ёстой болдог. Зохиомж гэдэг нь ямар их утга учрыг илэрхийлж буйг болон түүнийг ойлгож эзэмшсэнээр ямар гайхамшгийг бүтээж болдгийг, бүтээлд зохиомж ямар чухал болохыг дизайн, дүрслэх урлагийн чиглэлээр суралцахаар элсэн орж буй оюутан суралцагчид анхандаа тийм ч сайн ойлгодоггүй мэт санагддаг. Энэ нь бичиг үсэг сурч буй хүн үсгээ нүдэлж өөрийн болгосны дараа үг холбож уншдагтай адил тийм чухал суурь ойлголт юм. Хүмүүс бидэнд өнгө, хэлбэр, дүрсийн хоорондын зөв зохицолыг ойлгох мэдрэмж байгалиас заяасан байдаг. Энэхүү мэдрэмжээ тодорхой чиглэл, зорилгоор хөгжүүлэхэд л илэрхийлэх гэсэн санаа бодлоо бусдад болон өөртөө ойлгомжтойгоор яруу сайхан дүрсэлж болно.