ХХ зууны Монголын түүх үндэсний тусгаар тогтнолын төлөөх уухай, гадаадын цэргийн довтолгоон, харгислал, Ардын хувьсгалын түрлэг, их хэлмэгдлийн жавар үлээсэн жилүүд, хоёр ч дайны гал дундуур гарч, атар эзэмшин, орчин цагийн эрүүл мэнд боловсролыг хөгжүүлж, эцэст нь монгол хүн сансарт ниссэн гээд түүхийн олон нугачаанд унаж, босож явсан түүх билээ.
Энэ их салхи, шуурганд олон сайхан эрхэм амь насаа алдаж, олон хүн ноён нуруугаа хугалж, тухайн цагийн элдүүрт нухлуулж, тэнгэрт нисэх нь нисэж, газарт орох нь оржээ. Энэ хэцүү хүнд жилүүдэд ёс жудгаа алдаагүй төрийн хар хүний эрхэм чанарыг хадгалж, төрийн төлөө нэг ч өдөр амралгүй зүтгэсэн төрийн зүтгэлтнүүдийн нэг нь Монгол Ардын Хувьсгалт Намын (одоогийн МАН) нэгдүгээр нарийн бичгийн дарга агсан Дашийн Дамба билээ.
Аливаа хүн алдаа, оноог хослуулан амьдардаг жамаар Дамба дарга ороо бусгаа цагийн салхинд найгаж, алдаа ч хийж, амжилтыг ч бүтээж явсан нэгэн билээ. Түүний санал санаачилгын ачаар өнөөгийн Монголын иргэд эрүүл чийрэг өсөх нөхцөл бүрэлдэж, улс орны маань хүн ам саяын босго давж, түүний гаргасан иргэний зоригийн хүчинд олон хэлмэгдсэн хүмүүсийн ар гэрийнхэн “урвагч”, “тагнуул” гэх шившгийн тамганаас чөлөөлөгдсөн гэдгийг тэр бүр хүмүүс мэддэггүй. Учир иймээс олноо мартагдах хандлагатай болсон Дашийн Дамба гээч нэгэн төрийн зүтгэлтний түүхийг эрээнтэй бараантай, алдаатай оноотой, байснаар нь өгүүлж, эргүүлэн сануулахыг хичээлээ.