Монгол хүн өвөг дээдсийнхээ уламжлалт гүн ухаан, бэлгэдэлт оюун санаа, эрхэм ёс жудагийг танин мэдэж, сэтгэлдээ баринтаглаж, баримтлан мөрдсү хэмээвээс ..үе үеийн хаадын зарлиг айлдварыг эрхбиш тунгаан үзэх хэрэгтэй болно. Бидний дээдэс урт холын түүхэн нугачаанд сэрэхдээ сэрж, дэлхий даяарыг оройлохдоо оройлж ирсэн нь ард түмний маань хаан ухаантай холбоотой. Өөрөөр хэлбэл ард түмэн маань үеийн үед өндөр заяат хаадынхаа ухааныг дагаж, үг сургаалийг нь мөрдөж явсан үедээ эвтэй ч байж, хүчтэй ч байж. Харин эв эе алдагдаж, өөр хоорондоо сөргөлдөн тэмцэлдэх болсон цагаасаа хүчин суларч, олон үеийн оюун ухаан, хөлс хүч, яс цусаараа бүтээн цогцлоосон амьдрахуйн агуулгыг алдагдуулж эхэлсэн нь гашуун үнэн билээ. Түүхийн сургамжит чанар чухам үүнд оршино. Тиймээс эх түүхээсээ сургамж авч, оюун санааны хийгээд үзэл бодлын нэгдмэл чанарыг эгүүлэн сэргээх нь улс үндэстний сэргэн мандахын бэлгэт сайн шинж, утга учир тэр мөн. Энэхүү нэгдмэл чанарыг юухан хээхэн хэмээн монголчуудын басамжлангуй хэлдэг амьдралын жижиг сажиг, aap саархан зүйл дээр гэхээсээ илүү оршихуйн гол цөм болсон үнэт зүйлсийн тухайд хамааруулан авч үзэх учиртай.