Энэхүү хүнсний нэр томьёоны толь нь салбарын мэдлэг оюуныг утга учир, уялдаа холбоотойгоор хүн бүрд ойлгомжтой хэлбэрээр томьёолж, тогтсон нийтлэг аргаар эмхэтгэн, уншигч олны хүртээл болгох, хойч үедээ үе дамжин үлдээх эрхэм зорилготой бүтээл юм. Хүнсний салбарын шинжлэх ухаан, үйлдвэрлэл, практик үйл ажиллагаанд өргөн хэрэглэгддэг хүнсний нэр томьёоны тодорхойлолтыг тодорхой болгон цэгцэлж салбарын хөгжилд тус дэм болно. Сүүлийн үеийн янз бүрийн хэлтэй орчуулгын материалууд албан хэрэгцээнд өргөнөөр ашиглагдаж байна. Орчуулгын материалыг хувь хүн өөрийн дураар орчуулж монголын хөрсөнд буулгахдаа өөр өөр агуулгатай баримт бичгүүдийг гаргах тохиолдол их байна. Үүнтэй холбоотой мэргэжлийн орчуулгыг жигдлэх, агуулгыг өөрчлөхгүйгээр нэгдсэн сангаас тохирох мэргэжлийн үг хэллэгийг авч ашиглах, нэгдсэн ойлголтыг түгээх шаардлага байна.