Бид энэхүү каталогт Богд Жавзандамба хутагтуудын өмнөх дүрүүдийн талаар Л. Хүрэлбаатар, Г.Жамсранжав '2010', Н.Бизьяа '2015', мөн найман Богд Жавзандамба хутагтуудын намтрыг О.Батсайханы 2015 бүтээлийг үндсэн ишлэлд аван Агваан цүлтэм жамц '1995', С.Ичинноров '1995', Ж.Бодбаатар'2010', Ш.Сонинбаяр '2010' нарын судлаачдын өгүүлэл номоос мөн оруулав. Богд хаант Монгол улсын хувцас хэрэглэлийн талаар Х.Нямбуу '1993', шүтээн урлагийн дүр дүрслэлийн бэлгэдлийн талаар Г.Пүрэвбат '2016' R.Beer '1996'нарын бүтээлээс ишлэн оруулсан болно. Номын онцлог нь Монголын Богд Жавзандамба хутагтуудын судлал эрчимтэй хөгжиж буй бөгөөд Анхдугаар Богд Жавзандамба хутагт болон Наймдугаар Богд Жавзандамба хутагттай хамаарах эрдэм шинжилгээ судалгааны мэдээ сэлт баримт болон тэдгээрийн дүр хөрөг зургуудыг дорвитой судалсан судалгаануудыг түүвэрлэн оруулсан болно. Энэхүү Богд Жавзандамба хутагтуудын дүр дүрслэл, XVII-XX зуун цомогт бид Дүрслэх урлагийн музейд хадгалагдаж буй Богд Жавзандамба хутагтуудын дүрийг олон түмэн, судлаачдын билгийн мэлмийд өргөн барьж байна.