Бодит ахуйн амьдралд бодитой орших тоонуудыг бүхэлдгэн “бутархай тоо”
хэмээн тодотгосон энэхүү номын нэгдүгээр бүлэгт нэг талаасаа, тоолох ухаан,
тоолох урлагт сургадаг, нөгөө талаасаа, зөвхөн тоолох үйл, бутаргах санаагаар
л бүрэн эзэмшиж болдог натурал тоо, энгийн бутархай, аравтын бутархай, бүхэл
тоо, рационал тоо, тэдгээрийн үйлдлийн хууль зүй тогтлыг суралцагчдад уг мөн
чанараар нь амархан ухааруулж болох нэгэн аргазүй, хэрэглэгдэхүүн, үзүүлэнг
багтаасан бол харин түүний хоёрдугаар бүлэгт энгийн болон аравтын бутархайн
үйлдлийг чадварлаг гүйцэтгэж сургахад хүнийг хөтөлдөг алхамт 100 дасгалыг
бутархайг тоогоор загварчлан шийдэж болохын үлгэр, сонгомол зарим
бодлогын хамт оруулав.
Бутархайн тооны үйлдлийг жам ёсоор нь хийж сурсных нь үр болдог тоон
илэрхийллийн утгыг тоолж тооцоолж сурсан хүн цаашид алгебрт суралцахын эх
болсон үсэгт илэрхийллийнхийг төвөггүй хийж гүйцэтгэдэг. Тэгэхэд тэр зүй тогтол
сонирхдог, түүнд дурладаг болсон байдаг.
Тоолох ухаанд уг нь орших бутархай тооны энэ номын аргазүй,
тоолох урлагт ур нь байх бутархайн үйлдлийн тэрхүү 100 алхамт дасгал нь
яван явсаар, эцэстээ, зүй тогтлын дээд ухаан математикт хүн цаашид
төвөггүй суралцахын номын түлхүүр, түүнд өсөн дэвжихийн нуман тулгуур
болно.