Онолын болон эмнэлзүйн өндөр сэтгэлгээтэй эмч хүн өвчтөнийхөө биеийн ерөнхий байдал, өвчний шинж тэмдэг, бодит үзлэгээр илэрсэн өөрчлөлтүүдийг соргогоор таньж мэдрэн, урьдчилсан оношоо батлах, ялган оношлох, эмчилгээнийхээ үр дүнг хянах, эдгэрэлтийн зэргийг тогтоох бас өвчний тавиланг шинжих зорилгоор уг эмгэг, өвчний хөгжих зүй, жамыг гүнзгий ойлгосны үндсэн дээр өвчтөнд хийх биохимийн шинжилгээг туйлын оновчтой сонгодог. Эх хэл дээр туурвисан эмнэлзүйн биохимийн энэхүү анхны номонд анагаах ухааны болон дэлхий нийтийн нэр томъёо, хэллэгийг аль болох хэвээр нь хэрэглэж, биохимийн шинжилгээний хэвийн үзүүлэлтүүдийн түвшинг өөрийн орны судлаач-эрдэмтдийн гаргасан, тогтоосон түвшин, лавламж хэмжээг түүвэрлэн авч оруулсан байна.