Энэхүү зурган номд эх үрийн холбоо хийгээд нүүдэлчин Монголчуудын байгаль эхтэйгээ шүтэн барилдлагатай амьдарч ирснийг тодотгон өгүүлнэ. Түүнчлэн ахуйн хэрэглээний салшгүй хэсэг аргал түүдэг хэрэгсэл болох араг савраар дамжуулан нүүдлийн уламжлалт соёлын онцлогийн нэгээхэн хэсгийг харуулах болно. Монголын орчин үеийн комикс урлагийн өнгийг тодорхойлж түүхийг нь бичилцэж яваа авъяаслаг, залуу зураач Н. Эрдэнэбаярын энэ бүтээл хүүхэд залууст монгол үндэсний өв соёл, түүх, ёс заншлын талаар мэдлэг мэдээллийг өгөхийн зэрэгцээгээр даяаршиж буй ертөнцөд нүүдэлчдийн онцлог хэв шинж, биет болон биет бус өвтэй танилцуулж, улсаа сурталчлах нэн чухал хэрэглэгдэхүүн болно хэмээн найдаж байна.  

Аргалд явсан нь

Бумбардай-1

Бумбардай хүүгийн хөгжилтэй адал явдлын тухай өгүүлсэн энэ дугаарт монголчуудын үеэс үед уламжлан хэрэглэж ирсэн өвөрмөц сонин хүнс болох борц, түүнийг тойрсон үймээнийг өгүүлнэ. Хавар идэхээр бэлтгэж нөөцөлсөн борц алга болсноор зохиол эхэлнэ. Бумбардай борцны хулгайчийг олох болов уу. Борцоо гэртээ буцаан авчирч ээжийгээ баярлуулж чадах болов уу...?  

Борцны хулгай

Бумбардай-2

Хаврын нэгэн өдөр Бумбардай Банхар хоёр гэрийн гадна тоглож байлаа... Банхар гэнэт урд зүг рүү боргон хуцав. Ээж хүү хоёр өвлийг өнтэй давж, урин хавартай золгожээ. Ээж хүү хоёр гэрийн гадна гарч алсын барааг хараад нүүдэл ирж буйг мэдэв. Ингээд ирж буй нүүдлийг тосож цай уулгахаар бэлдлээ. Бумбардай хүү хэдэн сар ээж, Банхар хоёроосоо өөр хүн амьтны бараа хараагүй удсан тул нүүдлийн хүмүүс сонин содон байлаа...  

Нүүдэл айсуй

Бумбардай-3

Өнгөрсөн хавар баруун нутгаас өвөө эмээтэйгээ нүүдэллэн ирсэн Сараана охин аль хэдийн Бумбардайн сайн найз болжээ. Хургаа хариулахдаа байнга хамт явна. Мөн Банхар, Бозоохой хоёроо ч дагуулахаа мартахгүй. Гүн цэнхэр тэнгэрт үзэгдэх үүл ч алга, алсад сүндэрлэх уулс, мяралзан урсах голын тунгалаг ус харагдана. Ширэг ногоон зүлгэн дээр хургаа хариулж яваа хөл нүцгэн хоёр хүүхдийн нэг нь шилбүүрэн морь унажээ. Хүүхдүүд хургаа туусаар гол бараадуулав. Голын эрэг дээр Бумбардай, Сараана хоёрын урьд өрсөн чулуун гэр сүндэрлэж байлаа...  

Чулуун тоглоом

Бумбардай-4

Монголчууд зуны дэлгэр цагт сүү саалиа базааж хүнсний нөөцөө бэлтгэдэг онцлогтой. Сааль сүүний цаг нар ургахаас жаргах хүртэл үргэлжилдэг нарийн чимхлүүр ажил байдаг. Саалийн ажилд айл саахалтын хүүхдүүдийн ач тус их. Хурга буруулна, тугал хариулна, унага татна, аргал түүнэ. Энэ бүхнийг хөдөөний хүүхдүүд л мэднэ, бас чадна. Хотын хүүхдүүд тэр болгон мэдэхгүй. Үнээ, тугалаа нийлүүлчихвэл нэг өдрийн сааль алдана. Саалийн цагт хайнга хандвал чухам юу болдгийг бяцхан найз Бумбардай, Сараана, тэдний шинэ танил Сүмбэн гурвын хөгтэй явдлаас уншаарай.  

Саалийн цаг

Бумбардай-5

Монгол үндэстний баатар БУМБАРДАЙ. Сүүн цацал нэртэй зурган ном 6-р цуврал хүүхдүүд та бүхэндээ хүрч байна.Хайр гэгч хүн төрөлхтний хэл, соёл орон зайн ялгаанаас үл хамаарах ямар агуу зүйл болохыг 'Бумбардай' зурган ном дахин ойлгууллаа.    

Бумбардай (6 бүтээлт цуврал)