Монголын аман зохиол нь манай ард түмний үгийн урлаг, хэл соёлын шилдэг өв уламжлал билээ. Энэ гайхамшигт өвийг хүүхэд багачууд, сурагч, оюутан, сонирхсон хэн бүхний ширээн дээр иж бүрнээр нь хүргэж, айл бүрийн номын санд залах зорилгоор тэдгээрийг нэмэн дэлгэрүүлж, монголчуудын олон зууны турш ам дамжуулан хэлэлцэж ирсэн үлгэр, домог, ерөөл, магтаал, зүйр цэцэн үг, оньсого, таавар, тууль, бэнсний үлгэр, ертөнцийн гурав, хууч яриа, хурим найрын болон хүүхдийн аман зохиол зэрэг бүхий л төрлөөс дээжлэн авч, сэдэв агуулгаар нь зүйчлэн 8 боть бүтээл болгон хүргэж байна.  

Аман зохиолын дээжис

Орчин үед аман зохиолын төрлүүдээс ерөөл, магтаал нь харьцангуй амьд уламжлалаа хадгалж буй, хүний амьдрал ахуйд шинэ зүйлс нэвтэрч, шинэ мэдлэг ухагдахуун ихээр гарч байгаатай уялдан сэдэв агуулга нь улам бүр баяжиж байна. Эрт, эдүгээгийн уламжлал шинэчлэлийн холбоонд оршиж буй ерөөл, магтаал бол орчин цагт чухлаар тавигдаж буй нийгмийг сайн сайхан болгох, хүмүүсийн харилцаанд эелдэг дулаан уур амьсгалыг хэвшүүлэх асуудлыг шийдвэрлэхэд чухал нөлөөтэй юм. Ерөөл магтаал, түүнийг амьдрал ахуйдаа хэрэглэх монголчуудын заншил бол мартан гээж үл болох хамгийн эрхэм нандин зүйл бөгөөд энэ заншилд хүн хүнээ хүндэтгэх ёсны гүн утга учир агуулагдаж буйг үргэлж санах учиртай. Учир иймээс энэхүү бүтээлд аливаа тохиолдолд хэрэг болохуйц эртний болон орчин цагийн ерөөл, магтаалаас дээжлэн авч, сэдэв агуулгаар нь ангилан оруулжээ.  

Монгол ардын ерөөл,магтаал

Хүй нэгдлийн үеийн түүдэг галын дэргэд олны дундаас товойн гарсан хүчирхэг хүмүүс, өвөг дээдсинйхээ алдар гавьяаг магтан алдаршуулж, сүнс сүлдийг нь аргадан тайвшруулах учир зорилгоор үүссэн монгол тууль нь хэдэн мянган жилийн турш ам дамжин уламжлахдаа монголчуудын эрт үеийн ёс заншил, шүтлэг бишрэл, түүхэн дурсамж, тэмцэл ялалт, ертөнцийг үзэх үзэл, танин мэдэхүйн сэтгэлгээний өв хөрөнгийг агуулсан томоохон бүтээл болж уламжлан ирсэн билээ. Энэ ботид монгол угсаатны тууль, бэнсний (хятад- _дэвтэр_ ) үлгэрээс дээжлэн хүргэх зорилгоор монгол туулийн сэдэв, үйл явдлын төрлүүдээс төлөөлөх чанартай богиновтор туулиудыг сонгон авсан бөгөөд монгол туулийн дээжист 'Гэсэр', 'Жангар', 'Хан Харангуй' гэсэн 3 бүтээлийг зүй ёсоор хамааруулах тул хэсгээс нь сонгон авч оруулжээ.  