Магистрант Мэндмаагийн Пагмадулам нь 'Антоон Мостаэрт' Монгол судлалын төвийн 'Судлаач оюутан' төсөлд хамрагдаж, 2012, 2013 оны оюутны эрдэм шинжилгээний хуралд жил дараалан тэргүүн байр эзэлж байжээ. Тэрбээр сүүлийн жилүүдэд 'Хүүхэн хутагтын түүх домог, түүхэн дуу' гэсэн нэгэн сэдэв дээр голлон ажиллаж, 'Антоон Мостаэрт' монгол судлалын төвийн уралдаант шалгаруулалтад тэнцсэн байна. Эл номонд түүх домог, түүхэн дууны аман соёлын өв тээгчдээс олж цуглуулсан хувилбаруудыг урьд өмнө хэвлэгдсэн ном бүтээл, архивын баримт сэлттэй харгуулан түүхийн хувьд үнэн магадтай зүйлийг олж тодруулсан төдийгүй, түүх домог, дууны чанад дахь түүх, соёл, шашин суртахууны уялдаа холбоог гаргаж бэлгэдэл зүйн үүднээс задлан шинжилснээрээ онцлогтой.  

Хүүхэн хутагтын түүх домог, түүхэн дуу

'Антоон Мостаэрт' Монгол судлалын төвөөс залуу судлаачдыг дэмжих зорилгоор 'Залуу монголч' шилдэг бүтээлийн цуврал эрхлэн нийтлүүлж байгаагийн удаах нь залуу судлаач У.Бямбанямын энэхүү бүтээл болж байна. 'Хишиг: Монголчуудын хишиг хүртэх ёс, 'нүгэл төөрүүлэх' зан үйл' номыг туурвисан Хэл бичгийн ухааны магистр Уртнасангийн Бямбаням нь МУИС-ийн Утга зохиолын ажилтны ангид суралцаж байх үеэсээ монгол аман соёлыг сонирхон судалж мэргэшсэн бөгөөд түүний энэ судалгаа нь анх монгол аман зохиол дахь бугын дүр, бэлгэдлийг судлах оюутны эрдэм шинжилгээний илтгэлээс эхтэй юм. Монголчуудын ан агнуурын соёл дахь бугын нэр цээрлэх, эерүүлэх ёсны уламжлал хийгээд бугатай холбоотой бусад заншил, хорио цээр, домын зүйлсийг задлан шинжилж, монголчуудын соёл сэтгэлгээн дэх бугаар бэлгэдэх үзэл сэтгэлгээг тодруулах зорилгоор анх гараагаа эхэлж байсан энэ судалгаа өдгөө аман соёлын тодорхой дүр, бэлгэдлийн хүрээнээс нэгэнт хальж, монголчуудын 'хишиг' хэмээх өвөрмөц ойлголтыг задлан шинжилж, тайлж тайлбарласан, нийгэм хүмүүнлэгийн салбарын маш орчин үеийн түвшинд асуудлыг олж харсан, бичлэг найруулгын хувьд ч өвөрмөц, сонирхолтой ажил болсон байна.  

"Монголчуудын хишиг хүртэх ёс, ""Нүгэл төөрүүлэх"" зан үйл"

Хишиг

'Орчин үеийн монголын хэл, түүх, соёлын судалгаа' номонд Р.Сарангэрэл 'Ойлголтын харьцаанд тулгуурлаж хоршоо үг бүтэх нь', Д.Түвшинбаяр 'Интернет эх хэлний аюулгүй байдалд нөлөөлөх нь', Д.Номинтуяа 'Монгол хэлний жинхэнэ нэрийн ай, түүний хэрэглээний асуудалд', О.Цацрал 'Монгол хэлний 'зар сурталчилгаа' хэмээх үгийн утга, хэрэглээний асуудал', Г.Батболд 'Түрэг, Уйгурын Сэбиг хэмээх нэгэн улс төрийн цолны тухайд', У.Пүрэвжав ''Алтан ордны улс' нэрийг нягтлах нь', Х.Төмөрбаатар 'Тэмүжин Бөртэтэй хуримласан үйл явдлын он цагийг дахин нягтлах нь', Ц.Жамбалдорж 'Амарсанаа Манжид орсон тухайд', Д.Нямдорж 'Монгол оньсого дахь утга тодорхой зохиомол үсгээр оньсголох арга', Г.Мөнх- Эрдэнэ 'Аль соёл судлал вэ: Талбараа тодорхойлох шаардлага' зэрэг 10 гаруй залуу судлаачдын эрдэм шинжилгээний өгүүлэл багтжээ.  

Young Mongolist