МХЗЭ-ийн Төв хороо, Хүүхдийн төлөө фондын Төв комиссын шийдвэрээр 1983-1988 онуудад Монголын хүүхэд залуучуудын нэвтэрхий толийн анхны гурван боть нь “Миний эх орон-Монгол “, ”Аугаа их найрамдал”, “Дэлхий, хүн төрөлхтөн ” гэсэн нэрээр эрдэмтэн зохиолч Л.Түдэвийн удирдлагаар зохиогдон тэр үеийн ЗХУ-д хэвлэгдсэн билээ. Монгол улс дэлхий дахинд ардчиллын түүчээ болж, алдар цуу нь мандаж буй өнөө үед бид эх орныхоо түүхэн замнал, ард түмнийхээ соёл, шинжлэх ухааны ололт амжилтыг танилцуулах зорилгоор нэртэй эрдэмтэд, мэргэжилтнүүдийг оролцуулан “Хүүхэд залуучуудын нэвтэрхий толь ”-ийг гурван ботиор шинээр зохиож, өсвөр залуу үеийнхэндээ бэлэг болгон барьж байна. Ийнхүү Хүүхэд залуучуудын нэвтэрхий толийн нэгдүгээр боть “Монгол эх орон” нэртэйгээр эрхэм уншигчдадаа хүрч байна. Сэлэнгэ Пресс ХХК  

Монгол эх орон

Хүүхэд залуучуудын нэвтэрхий толь-I

'Хүүхэд залуучуудын нэвтэрхий толь'-ийн III ботид дэлхий, улс, нэрд гарсан хүмүүсийн тухай хүүхэд залуучууд, уншигчдад аль болох ойлгомжтой хэлбэрээр, судалгаа, бодит баримтад тулгуурлан бичиж оруулсан байна.   Дэлхийн тусгаар тогтносон улсуудыг тивээр ялган нэрийн эхний үсгийн дэс дарааллаар, тусгаар тогтнол нь олон улсын хэмжээнд хүлээн зөвшөөрөгдөөгүй байгаа улс, газар нутгийг бусад орны харьяанд байгаа гэсэн нэрээр оруулан улсуудын тухай бичихдээ байршил, хүн ам, нутгийн онцлог, цаг уур, байгалийн баялаг, эдийн засгийн хөгжил, зарим улсын түүхийн онцлох үйл явдлуудыг тусгайлан ялгаж бичсэн байна.   Мөн улс орнууд болон дэлхийн хэмжээнд түүхэн гавьяа байгуулсан удирдагч, эрдэмтэн судлаачид, урлаг соёлын зүтгэлтэн, монгол судлалд томоохон хувь нэмэр оруулсан гадаадын эрдэмтэд, монголын нэрийг гадаадад мандуулсан алдартай хүмүүсийг цагаан толгойн үсгийн дэс дарааллаар оруулжээ.  

Дэлхий, улс, хүмүүс

Хүүхэд залуучуудын нэвтэрхий толь III

“Монголын уламжлалт соёл, шинжлэх ухаан” хэмээх II ботид монголчуудын гэр орон, сууцны түүхэн уламжлал, хийц маяг, хүн амын суурьшил, хотжилт, монголчуудын үйл урлал, хувцас хэрэглэлийн уламжлал, монгол гэр бүл, овог, ураг садан төрөл, угийн бичиг хөтлөх, монголчуудын эрхэмлэн дээдлэх ёсон, үндэсний тоглоом наадам, монголын уламжлалт сурган хүмүүжүүлэх ухаан, шашин бөө, мөргөл, мал аж ахуй, газар тариалан эрхэлж ирсэн түүхэн уламжлал, шинжлэх ухааны уламжлал, хөгжил зэргийн талаар бичиж оруулжээ. Ботийн төгсгөлд дэлхийн хүн төрөлхтний түүхэнд бий болсон үйлдвэрлэл, техник технологийн ололт бүтээлүүд, утсан холбоо, гар утас, интернетийн хөгжлийн түүх, ертөнц, дэлхий, одон орон судлалын түүхэн үе шат, олон улсын нэгжийн СИ системийн үндсэн нэгжүүд тэдгээрийн адилтгах эх загварыг хавсралт болгосон байна.  