'Богд хаант Монгол улс гуравдахь хөршийн эрэлд' ботид Монголын засгийн газраас их гүрнүүдтэй харилцаа тогтоох эхний оролдлогууд, Юань Шикай ба Монголын асуудал, Монгол-Түвдийн гэрээ зэргийн талаар авч үзжээ. 'Монгол ба Түвд XX зууны эхээр' ботид шашин шүтлэгийн олон зуун жилийн түүхэн уламжлалтай Монгол ба Түвд XX зууны эхээр Манж-Хятадаас ангижирч де факто тусгаар тогтнолоо зарласан түүхийг анх удаа өгүүлнэ. Мөн 1913 оны Монгол-Төвдийн гэрээ байгуулагдсан түүхэн нөхцөл, гэрээний монгол ба түвд эх, Их гүрнүүд гэрээг хэрхэн хүлээн авсан түүхийг танилцуулна. Харин 'Амар сайд, Сэцэн хан нар 1925 онд Хятадад зорчсон нь' ботийг Монгол, Оросын архивын баримтад түшиглэн Монгол-Хятадын XX зууны харилцааны түүхийн нэгэн мартагдсан хуудсыг сэргээн мөнхлөх зорилгоор бичсэн байна.  

Богд хаант Монгол улс гуравдахь хөршийн эрэлд, Монгол ба Түвд XX зууны эхээр, Амар сайд, Сэцэн хан нар 1925 онд Хятадад зорчсон нь

XX зууны Монгол улсын гадаад харилцаа-3 боть

Япон-манжийн цэрэг 1935 оны 1 сард БНМАУ-ын уугуул нутаг Халхын сүмд байрладаг хилийн заставыг эзлэн авсанаар Монгол, Манжгогийн 'хилийн будлиан' гэгч үүсэж, улмаар 1939 онд  Халхын голын дайнд хүргэсэн түүхтэй. Халхын голын цэрэг-дайны ажиллагаа 1939 оны 5 сараас 9 сард болж өнгөрсөн боловч Халх голын дайныг тойрсон их гүрнүүдийн геополитик, улс төр-дипломатын үйл ажиллагаа 1935-1941 онуудад өрнөсөн гэсэн түүхийн шинэ гаргалгааг хийж, тэрхүү улс төр-дипломатын түүхийг Монгол, Орос, Японы архивын баримт бичиг дээр тулгуурлан бичсэн анхны бүтээл болно. 1935-1937 онд хэд хэдэн үе шаттай болсон Монгол, Манжгогийн Бага хурал, Халхын голын дайн дууссаны дараа БНМАУ, Манжгогийн хилийг нарийвчлан тогтоох зорилгоор 1939-1941 онд Чита, Харбин хотуудад ээлжлэн болсон БНМАУ, ЗСБНХУ, Япон, Манжго дөрвөн этгээдийн хэлэлцээг архивын баримт түшиглэн нарийвчлан харуулжээ. Номыг эх түүхээ сонирхогч, багш, оюутан, эх оронч иргэн бүрт зориулав.    