Хүн төрөлхтний охь дээд болсон хүмүүсээс авахуулаад эгэл жирийн нэгний хэлсэн онч мэргэн үгсийг түүвэрлэн монгол хэлнээ хөрвүүлэн англи хэл дээрх эх, тайлбар зургийн хамт оруулжээ. 'Авах хүнд нэг үг ч эрдэнэ. Орхих хүнд мянган үг ч улиг.' гэдэг билээ. Уншсан хүнд ухаарал бодрол үлдээн ажил амьдралын эрч хүч, сурч боловсрох хүсэл эрмэлзлэл, шинийг хийх урам зориг, тунгаан бодох мэргэн ухааныг өгөх болтугай.  

Мэргэн үгсийн чуулган 1.0

Мэргэн үгсийн чуулган номын хоёр дахь цуврал эрхэм уншигч таны гар дээр очиж байна. Энэ удаад шашин, улс төр, гүн ухаан, амжилт, найз нөхөд, бүтээлч зан, хүний мөс чанар зэрэг сэдвийн хүрээнд онч мэргэн үгсийг цуглуулан эмхэтгэлээ. Өнөө цагийн завгүй өрнөх өдөр тутмын амьдралын нэгэн хэвийн урсгалаас түр ч болтугай амсхийх бодрол ухаарлыг үлдээж чадваас энэ номын зорилго бүтэх нь тэр. Үгийн цаана буй утга, утгын цаана орших ухаарал нь уншигч таны оюуны гүнд үр болон суух болтугай. Эмхэтгэгч.  