Энэ номд Монголд Улсын Соёлын гавьяат зүтгэлтэн, академич Хорлоогийн Сампилдэндэвийн монгол аман зохиолын онол түүх хийгээд төрөл зүйлийн талаар туурвисан эрдэм шинжилгээ, сурталчилгааны өгүүллүүдээс 'Монгол аман зохиолын онол, түүх судлал', 'Хүүхдийн аман зохиол судлал', 'Монгол сурган хүмүүжүүлэх ухаан' гэсэн гурван бүлэгт түүвэрлэн эмхэтгэж зохиогчийн мэндэлсний 70 насны ойд зориулан нийтлүүлж байна. Академич Х.Сампилдэндэв нь аман зохиолын олон төрөл зүйлийн талаарх онолын ерөнхий ойлголт, уран сайхны онцлог, хэлбэр, бүтэц зохиомж, сэдэв агуулга, балар эртнээс XXI зуун хүртэлх хэдэн мянган жилийн хөгжлийн түүхийг тодруулах талаар ихээхэн ажил хийснээс гадна монгол аман зохиолын уран сайхны сэтгэлгээний хөгжил, аман зохиол, бичгийн уран зохиолын холбоо, монгол аман зохиолын дэлхийн бусад үндэстний аман зохиолтой холбогдох зэрэг олон талын асуудлыг хамарсан бүтээлүүдээрээ монгол аман зохиол судлалыг тогтолцоотой шинжлэх ухаан болгох үйл хэрэгт дорвитой хувь нэмэр оруулсан юм.  

Монгол аман зохиол судлал

Энэ номд Монголд Улсын Соёлын гавьяат зүтгэлтэн, академич Хорлоогийн Сампилдэндэвийн Монгол ардын зан үйл болон зан үйлийн аман зохиолын талаар туурвисан эрдэм шинжилгээ, сурталчилгааны өгүүллүүдээс 'Монгол зан үйл судлал', 'Ардын жүжиг наадмын аман зохиол' хэмээх хоёр сэдвээр түүвэрлэн эмхэтгэж зохиогчийн мэндэлсний 70 насны ойд зориулан нийтлүүлж байна.  

Монгол зан үйл судлал

Академич Х.Сампилдэндэв, монголын шинэ уран зохиолын түүх бичлэгийн салбарт тодорхой байрыг эзлэх эрдэмтэн мөн. Тэрээр 1985 оноос эхлэн хэвлэгдэн гарсан 'Монголын орчин үеийн уран зохиолын түүх'-ийн гурван боть (1985, 1989, 1996) бүтээлд хамтын зохиогчоос зохиогч, ерөнхий редактор хүртэл ажиллахдаа монгол яруу найргийн дэлгэрэнгүй түүхийг түүний зарим төлөөлөгчийн уран бүтээлийн хамт бичсэн юм. Ингэхдээ XX зуунд төрөн гарсан үе үеийн шилдэг яруу найрагчдын бүтээл туурвилын ур чадвар, уран сайхан, гоо зүйн үндэс, үндэсний онцлог, уламжлал шинэчлэлийн харилцаа холбоог нарийвчлан тодорхойлж өгсөн нь хэлбичиг уран зохиолын чиглэлээр ажиллаж суралцдаг өнөөгийн судлаач, багш, оюутан нарт чухал гарын авлагын нэг болсоор байна. Түүнчлэн 'XX зууны монгол зохиолчид' цуврал бүтээлийг санаачлан, таван зохиолчийн намтар уран бүтээл, нийт 30х.х нэг сэдэвт судалгааны зохиолыг бичиж хэвлүүлсэн нь түүний, монголын орчин үеийн уран зохиолын түүх бичлэгт оруулсан том хувь нэмэр юм.  

Х.Сампилдэндэв-Эрдэм шинжилгээний бүтээл