Монголчуудын утга соёл, үсэг бичиг олон зуун жилийн түүхтэй хэдий ч энэ гайхамшигт эрдэнэсийн сан бүрэн судлагдаагүй судлаачаа хүлээсээр байгаа билээ.   Төв Азийн нэн эртний соёлтой эх газрын монголчууд бидний бичгийн соёл боловсрол, арвин баялаг эрдэм ухаан, эх бичгийн талаарх судлал, судалгааны бүтээл үгүйлэгдэж буй энэ цаг үед бичгийн соёл, урлагийн талаар цуврал бүтээл гаргахаар санаа шулуудан судалсны үр дүнд цувралын дээж болох энэ номыг Уншигч танаа өргөн барьж байна.   Сурвалж бичиг, мэдээ баримт, судлаач эрдэмтдийн бүтээл, бие даасан судалгаа зэрэгт дулдуйдан Эртний үсэг бичгийн гарал үүсэл, түүний дэлгэрэл, Уран бичлэгийн тухай, Бийр бэхсийн урлаг, Монгол үсгийн урлаг, Монгол бичгийн эвхмэл хэлбэр, Монгол тамга зүйн судлал хэмээн төрөлжүүлэн Монгол түмнийхээ оюуны баялаг түүхийг, эртний үсэг бичгийн дэлгэрлээс тамга тэмдгийн урлаг хүртэл бичгийн урлагийн хөгжил дэвшлийг нэгтгэн танилцуулахыг зорьжээ.  

Монгол уран бичлэгийн түүх

Бичиг урлагийн эртний мартагдах дөхсөн уламжлалыг сэргээн шинэчлэх санаачлалгыг анх үүтгэн гаргасан хүний нэг нь энэхүү номыг туурвин толилуулагч Жалайр овгийн Батбаяр юм. Тэрээр өөрөө уран гоё бичлэгийн гоц авьяасаа төлжүүлэн билүүдэд зогсоогүй Монголын эртний уламжлалт уран бичлэгийг судлан цуглуулж шинжин ажиж түүндээ тулгуурлан уран бичлэгийн шинэ сургуулийг бий болгож байна. Бичих урлагийн монгол ухаан, монгол уламжлалын эрдэнэсийн өргөөнд нэвтрэх түлхүүрийг уран бичээч, судлаач Д.Батбаяр энэхүү сударт баринтаглан өргөн барьж байна.  