Програм хангамжийн түүхэн дэх гайхамшигт нээлтүүд, бүх тоон төхөөрөмжид ашиглах хоёртын тооллыг бүтээсэн Готфрид Лейбниц, анхны компьютер болох аналитик хөдөлгүүр дээр ажиллах кодуудыг бүтээсэн Ада Лавлейс, хамгийн анхны цахим тоон компьютерын тухай мэдэж авцгаая. Энэ номд мэдлэг сорих асуулт, хариулт, кодчиллын түүх, компьютерын түүх багтсан бөгөөд кодлогч гэж хэн болохоос эхлээд кодын тухай баримт, алдартнуудын тухай зургаар харуулж, цэгцтэй мэдлэг олгох юм.&nbsp;
Түүнчлэн “Мэргэжилтэнтэй танилцана уу” хэсгээс чадварлаг мэргэжилтнүүд болох Жефф Этвуд, Кики Протсман нарын ярилцлагыг уншаарай. Алдарт кодлогчид хэсэгт та бидний сайн мэдэх Марк Цукерберг, Билл Гейтс, Стив Жобс нарын талаар өгүүлсэн байгаа. Программ хангамжийн гайхамшигт нээлт мөн сампингаас IPad хүртэл тооцооллын гайхамшигт нээлтүүдийг энд өгүүлнэ.&nbsp;
Кодчилол номын шинэ содон баримтууд, асуулт, сорилууд нь бид яагаад код ашигладаг вэ? компьютерийн код хэрхэн ажиллладаг вэ? зэрэг олон асуултад хариулт өгч чадна. Сонирхолтой гэрэл зураг болон зураг чимэглэлүүд, түлхүүр мэдээллүүдээр дамжуулан хүүхдийн сонирхолыг татаж, тэд үргэлж олж мэдэхийг хүсэх болно.

Та юу олж мэдэхийг хүсэж байна вэ?

Кодчилол

Хүний бие номд эд эсээс эхлэн тархи хүртэл бие махбодын бүх зүйлийг багтаасан тул хүүхдүүдэд хүний бие хэрхэн ажилладаг талаар тодорхой ойлголт өгөх болно.&nbsp;
Эхийн хэвлий дэх ургаас эхлээд насанд хүрсэн хүний биеийн ясны бүтцийг хүртэл тайлбарлаж өгсөн тул үнэхээр сонирхолтой биш гэж үү? Хүн хэрхэн таван мэдрэхүйгээ ашиглан мэдэрдэг, булчин шөрмөс гэж юу вэ, хоол боловсруулах эрхтэн тогтолцоо хэрхэн ажилладаг талаарх нарийн төвөгтэй ойлголтыг хүртэл хялбар аргаар өнгөт зураг дүрс, тодорхой баримт ашиглан тайлбарласан тул хэн ч уншсан амархан ойлгох болно.

Хүний бие

Робот хэр хурдан гүйж чаддагийг чи мэдэх үү? Эсвэл хиймэл оюун ухаан гэж юу болохыг?&nbsp;
21-р зуунд дэлхий шинэчлэгдэн өөрчлөгдөж, бидний төсөөлж ч байгаагүй олон сонирхолтой нээлт хийгдэж, техник технологийн олон гайхалтай шинэ бүтээл бий болсоор байна. Үүний нэг бол яахын аргагүй робот билээ. Энэхүү номоор дамжуулан роботыг хэрхэн хийдэг вэ, хийхэд хэр хугацаа зарцуулах вэ, тэд хүмүүст яаж тусалдаг вэ, ирээдүйд роботууд яаж шинэчлэн өөрчлөгдөх вэ гэх мэт сонирхолтой асуултын хариултыг олж мэдэх болно. Хөгжилтэй асуулт хариулт, хамгийн сүүлийн үеийн мэдээ мэдээлэл, сонирхолтой зургаар дүүрэн тул хэнийг ч хэзээ ч уйдаахгүй.

Роботууд

Илүү ихийг олж мэдэцгээе!
Шинжлэх ухааны ертөнц гайхамшигтай сонирхолтой зүйлсээр дүүрэн. Аянга цахилгаан яагаад цахилдаг, дэлхийн татах хүчний онолыг хэн анх нээснийг мэдмээр байна уу? Тэгвэл шинжлэх ухааны гайхамшигт нээлтүүдийн талаар танин мэдэж, мэдлэгээ сориорой.&nbsp;
Энэхүү ном олон чухал нээлтүүдийг зураг болон товч тайлбаруудаар харуулсан бөгөөд хэн, хэзээ ямар нээлт хийснийг харуулах он цагийн товчоон, асуулт, хариултыг багтаасан юм. Тахиа өглөө яаж биднийг сэрээдгийг шинжлэх ухаан тайлбарлана. Тахианы хошуунаас гарсан дууны долгион агаараар дамжин чихэнд хүрнэ. Унтраалганы товчлуурыг дарснаар цахилгаан гүйдэл хэлхээгээр хэрхэн гүйж гэрэл хэрхэн асаахыг шинжлэх ухаан ойлгуулна. Хувцас биеийг хэрхэн дулаан байлгадгийг ч шинжлэх ухаан тайлбарладаг. Бид яагаад өдөр бүр хоол идэх ёстойг мөн л шинжлэх ухаан хэлж өгнө. Хөдлөх, өсөх, дулаацахад хэрэгтэй энерги, эрчмийг хоол тэжээл агуулдаг гэх мэт олон мэдээллүүд бий.&nbsp;
"Мэргэжилтэнтэй танилцана уу" хэсгээс Их Британи улсын Лондонгийн эзэн хааны коллежийн материал судлалын эрдэмтэн Доктор Сьюз Кундутай хийсэн ярилцлагыг уншаарай.

Шинжлэх ухаан

Энэхүү ном нь инженерчлэлийн ертөнцийн олон сонирхолтой баримт, зургуудыг багтаасан ном юм.
Галзуу хулгана хэрхэн ажилладгийг, инженерүүд сансарт юу хийдгийг мэдмээр байна уу? Тэгвэл хамтдаа олж мэдэцгээе. Эйфелийн цамхаг хэр өндөр вэ, Леонардо Да Винчи нисдэг машин зохион бүтээсэн гэж үнэн үү, инженерүүд ирээдүйн хоол хүнсний талаар ямар төсөөлөлтэй байдаг юм бол, ямар материал цахилгаан дамжуулдаг вэ гэх зэрэг олон асуултын хариултыг энэ номоос аваарай. Мөн мэдлэг сорих асуулт, хариулт, инженерчлэлийн он цагийн товчоон болон төрлүүдийг багтаасан бөгөөд инженер гэж хэн болох, юу хийдэг, анхны инженерүүд ямар хүн байсан, машин техник, тийрэлтэт хөдөлгүүр, нанотехнологи, био инженерчлэлийн тухай олон сонирхолтой мэдээллүүдийг багтаасан юм.&nbsp;
“Мэргэжилтэнтэй танилцана уу” хэсгээс Их британийн мэргэшсэн инженер доктор Люси Рожерсын ярилцлагыг уншаарай. Сонирхолтой гэрэл зураг болон зураг чимэглэлүүд, түлхүүр мэдээллүүдээр дамжуулан хүүхдийн сонирхолыг татаж, тэд үргэлж олж мэдэхийг хүсэх болно. Ирээдүйн мэргэжлээ сонгох, мэдлэгийн хүрээгээ тэлэхэд энэ ном та бүхэнд тусална.&nbsp;

Инженерчлэл

Амьтад ном нь олон сонирхолтой баримт, зургуудыг багтаасан бөгөөд уг номоос амьтад гэж юу вэ, түүний дотор сээр нуруутан, хөхтөн амьтад хаана амьдардаг, шувууд, хэвлээр явагчид, хоёр нутагтан, загас, сээр нуруугүй амьтад, шавж болон амьдрах орчны төрлүүд, дасан зохицолт зэрэг олон зүйлийн талаар олж мэдээрэй.&nbsp;
Манай дэлхий дээр сая сая төрлийн амьтад амьдардаг бөгөөд төрөл тус бүрийг зүйл хэмээн нэрлэнэ. Шоргоолжноос эхлээд заан хүртэлх бүх амьтдад цөөн хэдий ч адил төстэй зүйлс байдаг. Жишээ нь: нарны гэрлээс энерги авдаг ургамлаас бусад бүх амьтад амьд үлдэхийн тулд бусад амьд биетийг иддэг байна. Ургамал нүүж чаддаггүй байхад амьтад нэг газраас нөгөө рүү нүүдэллэдэг.&nbsp;
“Мэргэжилтэнтэй танилцана уу” хэсгээс Оксфордын их сургуулийн дэргэдэх ''Зэрлэг Байгаль Хамгааллын Судалгааны Нэгдэл''-ийн захирал, профессор Дэвид Макдоналдын ярилцлагыг уншаарай. Түүний багийнхан дэлхий дээрх олон төрлийн амьтдыг судалдаг бөгөөд онцгойлон арслангийн талаар судалгаа хийдэг.

Амьтад

Далайн тухай мэдлэгээ сорь, сонирхолтой хариултуудыг олж мэдээрэй!
Хөгжилтэй баримтууд, сонирхолтой асуултууд, таавар сорилуудаар дүүрэн энэхүү номоос та дэлхийн бөмбөрцөгийн цэвэр усны тухай, дэлхийн хамгийн том амьд биет юу гэдгийг, ямар мэргэжил далайн түүхийг судалдаг тухай гэх мэт далай доторх олон нууцын талаар олж мэднэ. Хязгааргүй гүн хөх ертөнцөөр хамтдаа аялцгаая.

Далай

Дэлхийн хамгийн өндөр уул юу вэ гэдгийг мэдэхийг хүсэж байсан уу? Эсвэл хамгийн том тивийг ч юм уу?&nbsp;
Энэхүү номоос бидний одоо амьдарч буй дэлхий хэрхэн яаж бий болсон, юу юунаас тогтдог, ямар ямар амьтан ургамал байдаг зэргийг олж мэдэх боломжтой юм. Дэлхий дээрх халуун цөмөөс эхлээд түүний гадаргууг бүрхсэн уулс, цөл, далай хүртэл ямар бүтэцтэй болох, яагаад улирал солигддог, усны эргэлт хэрхэн ажилладаг, яагаад хүн ам маань өсөн нэмэгдэж байгааг өнгөт зураг дүрсний тусламжтайгаар ойлгоход хялбар аргаар тайлбарласан тун сонирхолтой ном юм.

Дэлхий

Чулуун зэвсгийн үе нь хүн төрөлхтний түүхийн бараг дийлэнх үеийг хамрана. Археологчдийн малтан гаргасан эд өлгийн зүйлсэд үндэслэн бид чулуун зэвсгийн үеийн талаар мэдэж авдаг. Энд буй баримт, мэдээллийг мэдлэгийн сандаа нэмэрлэж найз нөхдөдөө ярьж өгөөрэй. Неандерталь хүмүүс хүйтэн агаарт амьсгалахад тохиромжтой том хамартай байжээ. Обсидиан чулуу бол дэлхий дээрх хамгийн хурц ирмэгтэй материал. Чулуун зэвсгийн үеийн хүмүүс обсидиан чулуу ашиглан маш хурц ирмэгтэй хутга хийдэг байв. Өнөөдөр ч гэсэн энэ чулуугаар хийсэн хутгаар нарийн мэс заслыг гүйцэтгэж байгаа гэх зэрэг олон мэдээллүүд энэ номд бий.&nbsp;
Энэхүү номд хөгжилтэй баримт, гайхалтай зураг, асуултууд багтаасан бөгөөд чулуун зэвсгийн үе гэж хэдий үеийг хэлдэг, чулуун зэвсгийн үеийн хүмүүс хэрхэн, хаана амьдарч байсан, мөстлөгийн үеийн тухай, чулуун зэвсгийн үеийн амьтад, арслан зааны тухай, багаж хэрэгслээ хэрхэн урладаг, чоныг хэрхэн гаршуулсан, тэр үеийн хувцас, сүсэг бишрэл, агуйн сүг зураг, анхны фермерүүдийн тухай бүхнийг олж мэдээрэй.&nbsp;
''Мэргэжилтэнтэй танилцана уу'' хэсгээс Лондон хотын музейн ажилтан Доктор Бекки Скотийн тухай уншаарай. Тэрээр Неандертал хүний судлалаар мэргэжсэн бөгөөд тэдний хэрэглэж байсан чулуун зэвсгийг нарийвчлан судлах замаар Английн суваг хавийн нутагт хэрхэн амьдарч байсныг нь илрүүлэхээр ажиллаж байгаа юм. Энэхүү ном нь түүхийн хичээлийн гарын авлага, мэргэжил сонгох, мэдлэгээ тэлэх зэрэг олон талын ач холбогдолтой.

Чулуун зэвсгийн үе

Манай гараг маш хурдан дулаарч байгаад юу нөлөөлж байгааг олж мэдэхийг хүсэж байна уу? Бас дэлхийн дулаарал эрс тэс уур амьсгалыг хэрхэн үүсгэж байгааг? Тэгвэл энэхүү номоос эдгээр асуултын хариуг, түүнээс ч илүүг олж мэдээрэй.
Уур амьсгалын өөрчлөлт нь аюулд өртөөд буй манай гарагийн тухай гайхам сонирхолтой баримтууд, гайхалтай өнгөлөг зургуудаар дүүрэн төдийгүй агуу санаануудыг тусгажээ.

Уур амьсгалын өөрчлөлт

Энэхүү номонд хүүхдүүд нарны аймгийн талаар мэдэж болох бүх мэдээлэл бий. Ангараг гараг руу аялах боломжтой юу, Бархасбадь гарагийг цаг агаар ямар байдаг бол, бусад гарагууд юунаас бүтсэн бэ, бидний амьдардаг дэлхийтэй ижил зүйл байгаа болов уу, тэд дэлхийгээс хэр том бас хэр жижиг юм бол гэх зэрэг сонирхолтой мэдээллийг олж мэдээрэй. Тэдгээрийг өнгөлөг зураг, баримтын хамт хялбар аргаар тайлбарласан тул хэн ч уншсан үнэхээр сонирхолтой байх болно.

Нарны аймаг

Илүү ихийг олж мэдэцгээе!
"Олжмэд!'' цувралын ном тус бүрд мэдлэг сорих асуулт хариулт, он цагийн товчоон, агуу нээлтүүд, амьтад, ургамлын төрлүүдийг багтаасан зурган хүснэгт болон олж мэдсэн зүйлсээ бичих хуудас бий. Ой модонд ямар амьтад амьдардаг бол гэж сонирхож байсан уу? Эсвэл яагаад зарим модод өвөл болохоор навчсаа гөвдөг юм бол?&nbsp;
Дэлхий дээрх хүчилтөрөгчийн хорин хувийг Амазоны ширэнгэн ой ялгаруулдаг. Дэлхийн шувуун төрлийн гучин гурван хувь нь Амазоны ширэнгэн ойд амьдардаг. Галд өртсөн ой мод 50-100 жилийн дараа шинээр ургаж шинэчлэгддэг. Нэг минутад тавин хөл бөмбөгийн талбайтай тэнцэхээр модыг өдөр бүр огтолж байгаа нь үнэхээр харамсмаар тоо баримт юм. Өнөө цагт эмчилгээнд хэрэглэж байгаа эмийн ургамлын 25 хувийг ширэнгэн ойгоос түүж ашигладаг. Нэг том мод дөрвөн хүний өдрийн хэрэглээний хүчилтөрөгчийг ялгаруулдаг. Хэрэв та модны тайрдастай таарвал тухайн мод хэдэн нас насалсныг тойргийнх нь тоогоор мэдэж болно. Ойролцоогоор 100 жилийн дараа ширэнгэн ой үгүй болох аюул нүүрлэж байгаа зэрэг олон сонирхолтой мэдээллийг энэхүү номоос олж уншаарай.&nbsp;

Ой мод

DK олж мэд! Умард болон өмнөд туйл ном нь туйлын тухай гайхалтай баримтууд, сонирхолтой гэрэл зургуудыг багтаасан төдийгүй нимгэн ч гэлээ өргөн агуулгатай ном юм. Умард болоод Өмнөд туйлийн тухай олон сонирхолтой баримттай танилцаарай. Жишээ нь: Евроазиас умард туйлд нүүн очсон хүмүүс бол анхны туйл судлаачид төдийгүй тэндхийн анхны иргэд ажээ. Тэд ойролцоогоор НТӨ 2500 онд Умард туйлд хүрчээ. Гринландын нийт газар нутгийн 70 хувь мөсөн бүрхүүлтэй. Цагаан баавгай, туйлын үнэг зэрэг амьтад нь туйлын цаг уур, орчиндоо уусах мэт цагаан үс ноостой болж хувьсан өөрчлөгдсөн байдаг. Нарнаас цацарсан, энгийн нүдээр харахын аргагүй өчүүхэн жижиг атомууд дэлхийн соронзон орон (дэлхийг тойрсон соронзон хүчний талбай)-д орж ирмэгцээ манай агаар мандлын хийн атомуудтай мөргөлдөж эмх замбараагүй хөдөлдөг юм. Энэхүү хөдөлгөөний эрчим гэрэл болж харагддагийг нь бид “Туйлын туяа” хэмээн нэрлэж хэвшжээ. Титаникийг живүүлсэн мөсөн уул Жакобшавн хэмээх мөсөн голоос тасарсан гэх мэт олон сонирхолтой баримтыг мэдэж аваарай.

Олжмэд! (12 бүтээлт цуврал)