Гурван ботиос бүрдэх энэхүү дээж ном нь Монголын шинэ үеийн уран зохиолыг үндэслэгч их зохиолчдын үе үеийн хүүхэд багачуудын унших дуртай, үлгэр дууриал, бахархал болсон бүтээлүүдээс сорчлон, мөн ардын аман зохиолын баялаг өвөөс авч оруулсан болно. Энэхүү сургуулийн бага, дунд насны уншигчдад зориулан гаргаж буй II боть нь хүүхэд багачууд, эцэг эх, сурган хүмүүжүүлэгч багш нарын гараасаа салгалгүй шимтэн унших дуртай ширээний ном болно гэдэгт итгэж байна.  

Монголын хүүхдийн уран зохиолын дээж-II

Монголчууд өвөг дээдсийн үеэсээ үр хүүхэддээ зориулсан аман зохиол болон бичгийн соёлын баялаг өв үлдээжээ. Хүүхэд багачууд нялхаасаа ээжийн бүүвэйнд өсөн, торниж, хэл хөлд ормогцоо өхөөрдлийн үг, зугаа үг, жороо үг, түргэн хэллэг, оньсого, цэцэн үг, ертөнцийн гурав, үлгэр сонсч ухаан тэлдэг байсан. 'Өнчин хүүгийн цэцэлсэн шашдир', 'Оюун түлхүүр' зэрэг бичиг зохиолыг аав, ээж нь уншиж өгдөг байжээ. Монголын зохиолчид энэхүү баялаг уламжлалыг хөгжүүлж хориод оноос эдүгээ хүртэл хүүхэд багачууддаа шилдэг сайхан бүтээлээ зориулж ирлээ. Эдгээр он жилүүдэд бүтээж туурвисан олон зуун бүтээлээс сонгож, 100 гаруй зохиолчийн шилдэг бүтээлийг гурван боть болгон хэвлэсэн байна. Энэхүү I ботид ууган зохиолч Д.Нацагдорж, С.Буяннэмэх нараас эхлээд манай хүүхдийн зохиолын хоймор эзэлсэн алдарт буурлууд П.Хорлоо, М.Чимэд, Д.Цэвэгмид, 60-аад оноос бие даан хөгжсөн Монголын хүүхдийн уран зохиолын ахмад зүтгэлтэн Д.Содномдорж, Л.Түдэв, Ж.Дашдондог, С.Надмид, Д.Гармаа нарын бүтээлээс гадна сүүлийн үед нэрд гарч яваа Д.Сундуй, З.Түмэнжаргал зэрэг үе үеийн хүүхдийн зохиолчдын шилдэг бүтээлүүд орж байна.  

Монголын хүүхдийн уран зохиолын дээж-I

Монголын хүүхдийн зохиолын тодорхой (XX зуун) үеийг харуулахуйц гэж болох бүтээлийн дээж гурвал боть ном уншигчдад очиж байна. Цаг хугацааг эрдэм боловсрол, эрүүл мэнд, эд баялаг болгон хувилгадаг ухаалаг уншигч та ч бас хүүхдүүдтэйгээ хамтдаа эдгээр номын баатруудтай таницлвал нэгэн зуунаас нөгөө зуунд шилжсэн монголчуудын хүүхэд насны бодол санаа түүний уншигчид болох 1990 оныхны балчир, залуу үе бас ажиглагдах болно. Энэ ном хүүхэд багачууд, эцэг эх, сурган хүмүүжүүлэгч багш нарын гараасаа салгалгүй шимтэн унших дуртай ширээний ном болно гэдэгт найдаж байна.  

Монголын хүүхэд, залуучуудын уран зохиолын дээж-III

Монголын орчин цагийн уран зохиолын сонгодог төлөөлөгчид болох Ч.Ойдов, Л.Ванган, Ч.Лодойдамба нараас эхлээд одоо үед хүүхдэд зориулан зохиол бүтээлээ туурвиж буй ихэнх нь жүжиг бичсэн байдаг. Тэдгээрийг шүүн тунгаах аваас энэ цагийн бяцхан уншигчдын хэрэгцээ шаардлагад нийцэхүйц бүтээл нилээд бий. Гагцхүү тэдгээрийг тайзнаа амьдруулах гэдэг нь найруулагч нарын эрхэм үүрэг, түүнчлэн уншигч хүүхэд багачууд маань ийм ийм жүжиг байдгийг мэдэж авах, улмаар анги сургуулийнхаа хэмжээнд найруулан тоглох зэрэгт нь нэмэр болох үүднээс нэлээд хэдэн жүжгийг энэхүү ботиороо дамжуулан өргөн барьж байна. Эл ботид дээр нэр дурдсан алдартнуудаас эхлээд өдгөө туурвиж буй нөхдийн бүтээлүүдээс сонгон авсан бөгөөд зохиолчийнх нь намтарыг зургийн хамт оруулсан болно.  