'Хайр' гэдэг сайн сайхан зүйл маань яг үнэндээ дэлхий тэнхлэгээрээ эргэж нарны гэрлийг хүртдэг шиг сайхан муухай хоёр нь жамын өмнө ээлжилдэг гэдэг утга санааг гаргах гэж хичээлээ. Хайр бол 'гайхамшиг', Хайр бас 'гай гайхамшиг'. Та хайраас энэ хоёрыг мэдэрч чадсан бол танд хайр бас байсан байгаа.    

Хуримын гэрч

Би бээр тус номонд гарч буй ихэнх улс орон хот суурин, байгаль уул усыг өөрийн биеэр үзэж өнгөрсөн. Заримаар нь аялж, зарим газар нь амьдарч, зохиолд гарч буй зовлон жаргалын аль алинаас нь балгаж залгиж байлаа. Цаашид ч явах олон зам надад буй гэж өөртөө хэлдэг. Дараагийн цувралуудаар илүү сонирхолтой адал явдал, гайхамшигтай аялал та бид хоёрыг хүлээж буй гэдэгт итгэж байна. Ертөнц дээр хэн ч чамд итгэхгүй үе ирж болно. Итгэл үнэмшилдээ л үнэнч үлд. Найдвар хэзээд байдаг... Энэхүү роман нь 2017 онд хэвлэгдсэн цагаасаа багагүй маргаан дэгдээж, өнөө хэр шилдэг борлуулалтад багтаж байгаа бөгөөд 2018-2019 онд Герман, Англи, Орос, Хятад хэлнээ орчуулагдан гарах юм. Тус бүтээл нь орчин цагийн Монголын үргэлжилсэн үгийн зохиолд шинэ хуудас бус нэн шинэ “ХАВТАС” нээсэн бүтээл болсон гэдгийг уншигч та нээгээд л мэдрэх болно. Зохиолчийн бичлэгийн хэв маяг, үгийн сонголт, үйл явдлын сүлжээс, цаг хугацааны нугалам, алслалт ба товчлол, урсгал, тайлал зэрэг нь нэн өвөрмөц төдийгүй романы санаа, бичвэрийн онцлог нь дэлхийн хэмжээний тэр дундаа орчин цагийн Европ Америкийн уран зохиолд дүйж очихуйц ба үйл явдлын өрнөл нь олон улс орныг хамарч буйгаараа маш сонирхолтой болжээ. Түүний зохиолыг уншихад Холливудын адал явдалт кино үзсэн мэт догдлуулж, зохиолдоо уусан өөрөө амь дүйж, аюулын ирмэгт байгаа юм шиг санагдана.

Вангийн нулимс

Уншигч та, зохиолч сэтгүүлч Todko Samson-ны “Вангийн нулимс” романыг хэдийн мэдэх болсон билээ. Энэ удаа тус романы удаах дэвтэр “Харь хэлээр яригсад” хэмээх онц сонирхолтой, түүхэн, баримтат, адал явдалт романыг өргөн барьж байна. Тус роман нь бүтэн хоёр жилийн нөр их судалгаа, мэдээлэл дээр суурилагдан бичигдсэн бөгөөд утга зохиол шүүмжлээч нараас 'тун гайхалтай бүтээл' болсон хэмээн дүгнэгдээд байгаа билээ. Энэхүү роман нь түүхэн болон одоо цагийн гайхам сонирхолтой холбоос, өвөрмөц бичлэгийн арга барил, кино үзэж буй мэт дүрслэл, өгүүлэмж, дүрүүд, мэдлэг мэдээллээр баялаг байдал зэргээрээ уншигч нарын талархлыг хүлээх бүтээл болжээ. Зохиолчийн урлахуй ур чадвар, өнгөрсөн, одоо, ирээдүй цагийг үйл явдалтайгаа сүлсэн олон тааварлашгүй ээдрээ түүний тайлал зэргийг маш нарийн сийлж чадсан нь гайхалтай.  Ном нээмэгц “Мэдэх эрхгүй түүхээс, Зорих ёсгүй ирээдүйг чиглэж буй ард түмэнд” хэмээн зохиолч маань бидэнд хаяглажээ. Ингээд бидний мэддэг гэж эндүүрдэг, огт мэддэггүй үнэн юу байв? “Чамд хэн итгэх юм бэ?” хэмээх гурамсан романы дэд дэвтэр хэрхэн өрнөх бол?...  

Харь хэлээр яригсад

Ер нь 'Чамд хэн итгэх юм бэ?' гэх цуврал романууд тус бүрдээ өөр өөр сэдэв, бичлэгийн төрөл, шинж чанар, өгүүлэмжийг агуулах гэж зорьсон. Эхний дэвтэр 'Вангийн нулимс' роман шинжлэх ухааны баримтат-адал явдалт. Удаах дэвтэр 'Харь хэлээр яригсад' роман нь түүхийн баримтат-адал явдалт. Харин одоо уншигчдын гарт очиж буй 'Дээд айл' роман бол сэтгэхүйн триллер төрлөөр бичигдсэн бөгөөд 'Вангийн нулимс' романы мөчир бүлэг болон салаалан бие даасан чанартай.  

Дээд айл

Зохиолч, сэтгүүлч Todko Samson-ны 'Чамд хэн итгэх юм бэ?' цуврал буюу 'Вангийн нулимс', 'Харь хэлээр яригсад', Дээд айл', Миний хайрт, миний хуримын гэрч' цуврал романуудын сүүлчийн дэвтэр 'Сүрэг' роман.  

Сүрэг

<h2>ЗОХИОГЧИЙН ЗУРВАС</h2>Энэ аялал 2016 онд оргүй хоосноос эхэлж байлаа. Эдүгээ найман жил өнгөрчээ. Хүний амьдралын найман жил гэдэг нэг талаараа асар их хугацаа. Нөгөө бодлын нумаасаа сугарсан сум шиг хурдан өнгөрдөг юм байна. Өнгөрсөн бүхий л хугацаанд хамт байж, цуврал бүрийг шимтэн уншиж байсан эрхэм уншигч танаа гүн талархаж, энэ аяллыг хамт төгсгөхийг хүсэж байна.“Чамд хэн итгэх юм бэ?” цувралын сүүлчийн дэвтэр болох “Үр хөврөл” роман нь өмнөх дэвтрүүдээсээ хэд хэдэн онцлогтой гэдгийг эрхэм уншигч танд нэн тэргүүнд дуулгах учиртай буй за. Өмнөх цувралууд нь шинжлэх ухааны баримтат, сэтгэхүйн триллер, хайр сэтгэлийн романс, түүхэн романс, шидэт реализм гээд өөр өөрийн өнгө хэмнэлтэй байсан бол энэ дэвтэр нь “Диалоги” буюу харилцан яриа төрлөөр бичигдсэнээрээ онцлог. Энэ төрлөөр бичих асар хүчир юм байна гэдгийг эхнээс нь л мэдэрсэн. Гэвч нэгэнт зорьсон хойно дуусгаад ард нь гарахаас яах вэ. Дүрүүдийн харилцан яриан дотор цаг үеийн нөхцөл, түүхэн баримт, үйл явдлын учир зангилаа, дүрийн мөн чанар, орчны зураглал зэргийг багтаана гэдэг төсөөлснөөс өөр байлаа.Мөн шинжлэх ухааны зөгнөлт роман гэж хэлж болно. Өнгөрсөн түүх, өнөөгийн бодит төрх, ирээдүйн боломж ба эрсдэлийн тухай энд өгүүлнэ. Бидний анзаардаггүй, заримдаа үл ойшоодог зүйлс ямар их үнэ цэнээр бүтсэн бэ гэдгийг таниулах гэж хичээлээ. Хүн төрөлхтнийг үсрэнгүй хөгжилд хүргэх, эс бөгөөс үгүй хийж ч болох шинжлэх ухааны нэгэн салбарын тухай энд хөндлөө.Бидний сайн мэдэх, эх орон, эрх чөлөө, тусгаар тогтнолыг эргүүлэн авч ирсэн түүхэн дүрүүдийг эмэгтэй хүн, эх хүний харах өнцгөөс сийрүүлж, шинээр танилцуулах гэж зорьсон минь хэр ончтой байсныг уншигч та дэнслэх биз ээ.Номын эхэнд “Дэлхийн цаг тооноос зуун жилээр хоцорч буй ард түмэнд зориулав...” гэснийг эрхэм уншигч та хэлтрүүлэн уучлахын дээр зөвөөр тунгаана хэмээн найднам. Өнөөдөр бид хоёр хөршийнхөө амыг харж, тогоог нь өнгийсөн, авахаас илүү гарахгүй, арчаа багатай байгаагаа үнэнээр нь зөвшөөрөх ёстой. Бид дэлхийн цаг тооноос, хөгжил дэвшлээс хоцорсон гэдгээ ичин байж улайх хэрэгтэй. Ахуйдаа адилхан мэт боловч асар олон салбарт бид цаг хугацааны өнгөрсөнд гээгдээд үлдчихсэн. Хэрэглээ нь адилхан боловч сэтгэлгээ нь хоцорчихсон гэдгээ үнэнээр нь хүлцэх хэрэгтэй. Заримдаа надад дэлхий биднийг хаяад явчихсан гэмээр мэдрэмж төрдөг. Энэ зохиолын эмзэглэл үүнээс үүдэлтэй гэж хэлж болно. Бидэнд агуу түүх байна. Сайхан эх орон, газар нутаг байна. Эрх чөлөө, тусгаар тогтнол байна. Харин эх оронч засаглал алга. Шударга ёс, үнэн алга. Бидний хоцорч байгаа шалтгаан ердөө л энэ байж мэднэ.Өнгөрсөнд “Хэрвээ” гэж байдаггүй. Харин ирээдүй бол “Хэрвээ”-гээр дүүрэн. Ирээдүйг хаашаа чиглүүлэх нь өнөөдрийн үйл сэтгэлийн үр хөврөлөөс шалтгаалах нь үнэн.Ингээд өнгөрсөнд юу болсныг, одоо юу болж байгааг, ирээдүйд юу болж магадгүй вэ гэдгийг танин мэдэх цаг хугацааны аялалд таныг урьж байна.