Түүнийг Динза гэдэг. Тэр бол эрт галаваас манай үед ирсэн аварга өндөгнөөс гарсан маш гайхалтай , өхөөрдөм, бяцхан Динозавр. Шинэ найзыг нь хүмүүс ойлгохгүй байх гэсэндээ Жижгээ хүү Динзаг бүхнээс нууцлахаар шийдддэг. Хүмүүсийн амьдрах орчинд Динза гайхалтай хурдан зохицож, бүх зүйлийг амархан сурна. Тиймээс хоёр бяцхан найз маань хөгтэй адал явдлаар үргэлж дүүрэн байх бөгөөд тэдний нөхөрлөлд олон саад бэрхшээл тулгарах аж. Хүүхдүүдээ, эр зориг, үнэнч нөхөрлөл, ид шидээр дүүрэн “Динза” шинэ комиксоо дугаар алгасалгүй уншиж, тэдэнтэй улам дотно танилцаарай.  

Динза-1

Энэ дэвтэрт зохиолын гол баатар болох бяцхан найзууд маань байгалийн музей үзэж улмаар Динза өөрийгөө энэ дэлхий дээр үлдсэн цорын ганц динозавр гэдгээ мэднэ. Гэвч тэрээр шинэ гэр бүлдээ дассаар байх бөгөөд Жижгээ хүү түүнд үргэлж анхаарал тавина. Авьяаслаг бяцхан Динза ямар ч зүйлийг амархан сурдаг болохоор өдөр бүр шинэ зүйл бүтээх нь Жижгээг улам бүр гайхшруулсаар...  

Динза-2

Хөөрхий Жижгээ ээжийгээ өвдсөнд их шаналдаг. Гэсэн хэдий ч тэр өмнөх олон саадыг даван туулсан шигээ энэ аймшигт өвчнөөс ээжийгээ аварч чаддаг болов уу? Харин энэ бүх ээдрээт саадыг тэр дотны найз Динзагүйгээр даван туулж чадахгүй шүү дээ. Тэдний нөхөрлөл л энэ олон оньсого шиг саад бэрхшээлийг даван туулах түлхүүр болж өгдөг юм. Гагцхүү тэдний энэ удаагийн аялал цаашид хэрхэн өрнөх талаар ээлжит цувралаас уншаарай.  

Динза-3

Хүүхдүүд ээ, найздаа туслахаар алсыг зорьсон бяцхан Динзагийн аян үргэлжилсээр. Хөвсгөл далайн хойд хязгаарт их тайгын гүнд амьдрах 200 наст шидтэнтэй уулзахаар явсан түүний замд муу сүнснүүд тааралдах аж. Энэ үед Динзагийн хаашаа явсныг мэдэлгүй үлдсэн Жижгээ хүүхэд ганцаардаж, найзынхаа араас санаа зовнино. Динза Хөвсгөлийн их тайгаас хайж очсон 200 наст шидэт эмээгээ олж чаддаг ч эмээ түүний бодож байсан шиг сайхан ааштай хүн биш байлаа. Эмээгийн буга нь хүртэл Динзад багагүй төвөг учруулна. Гэвч зоригт бяцхан Динза өөрийнхөө зорилгод хүрч чадах болов уу?  

Динза-4

Найздаа туслахаар алсыг зорьсон Динза эргэж ирлээ. Гэтэл ажлаасаа халагдсан аав болон өдрөөс өдөрт бие нь муудсаар байгаа ээжийгээ хараад Жижгээ хүү шаналсаар байх аж. Энэ үед муу сүнснүүд бяцхан Динзаг устгах арга сүвэгчлэн хар хүчний эзэнтэй уулздаг ч буцах замдаа ховдог шуналаасаа болж саатна. Энэ хороонд хоёр найз мэдээж чулуун сахиусыг гартаа оруулж амжих бөгөөд шидэт судрын байгаа газрыг ч олно.  

Динза-5

Динза, Жижгээ хоёр үлэг гүрвэлийн эрин үеэс эргэн ирлээ. Мэдээж тэд муу сүнснүүдийг ялснаар ээжийгээ аварч чадна. Ийнхүү хоёр найз энэ цаг үедээ ирж, одоо л нэг Жижгээгийн гэр бүлд амар тайван байдал ирэх нь гэтэл бас үгүй ээ. Энэ удаа муу сүнснүүд Жижгээгийн гэр бүлийг бүр мөсөн үгүй хийхээр шийджээ. Дахиад л давахын аргагүй мэт хүнд хэцүү зовлон бэрхшээл тулгарахад Жижгээ, Динза хоёр юу хийх ёстойгоо мэдэхгүй шанална .Ингээд эцэст нь тэд шидэт сахиус дээр очиж гэр бүлээ зовлон бэрхшээлээс аврахын тулд дараагийн цаг хугацааны аялалдаа гарна.  

Динза-6

Энэ дэвтэрт бяцхан найзууд маань араатнаар дүүрэн ширэнгэн ой, айдас хүрэм дайн тулаан гээд олон хүнд хэцүү зүйлтэй тулгардаг. Харин муу ёрын сүнснүүд бяцхан найзуудыг устгахаар газрын омгийн ахлагчийн биед шингэж орно. Хамгийн сонирхолтой нь нисдэг омгийн ахлагчийн хүүд Жижгээд байдаг шиг ижил чулуун сахиус байх ажээ. Энэ нь чухам ямар учиртай юм бол бас Жижгээ Динза хоёр маань гэр бүлээ аврах бизнесийн шинэ санаагаа энэ бөглүү газраас яаж олох юм бол. Ямартай ч шидэт сахиус тэднийг энд дэмий авчраагүй нь лавтай.  

Динза-7

Динза Жижгээ хоёр өнгөрсөн үеэс одоо үедээ ирэх цаг нь болжээ. Бяцхан найзууд маань баяр хөөрөөр дүүрэн гэртээ ирэхэд байдал яг хэвээрээ угтах ажээ. Шидэт сахиус тэдэнд байраа авч үлдэхэд нь тусална гэж худал хэлсэн юм болов уу хэрэв тэр худал хэлээгүй л юм бол зоригт найзуудад маань ямар нэг арга зам зааж өгөх ёстой шүү дээ, тийм үү. Магадгүй Динзагийн нулимсаар бохь хийж зарах санааг олох ч юм билүү. Тэгвэл хүүхдүүд хайртай баатрынхаа нэртэй бохинд хамгийн дуртай байх байлгүй. Тэдний нэг нь чи ч байж болно шүү дээ. Мэдээж нөгөө талд ялагдсан муу сүнснүүд хоёр найзыг устгах биш харин салгахаар шийднэ.  

Динза-8

Динза Жижгээ хоёрт тохиолдох адал явдлын үргэлжлэлд муу сүнснүүд дахиал л хоёр найзыг устгах дараагийн аргаа хэрэгжүүлж эхэлнэ. Харин тэдний хорон санаанд Хонгороо охин өртөж, Динзад шинэ сорилт тулгарна. Мэдээж зоригт Динза маань Хонгороогийн төлөө муу сүнснүүдтэй дайтах нь тодорхой. Харин яаж гэдэг нь хамгийн сонирхолтой асуулт болон үлдэж байна.  

Динза-9

Хонгороог хулгайлсан муу сүнснүүд Динза, Жижгээ хоёрыг устгах гээд бүтэлгүйтжээ. Хар шидтэн бол хамгийн аюултай дайсан гэдгийг та нар мэднэ шүү дээ. Шидэт сахиус муу санаат хар шидтэний гарт орсон болохоор хүн төрөлхтөнд мөхлийн аюул нүүрлэх нь лавтай. Тэгвэл ийм хэцүү үед зоригт бяцхан найзуудад маань хэн туслах юм бол? Арай алс тайгад амьдардаг удган эмээ нь ирэх юм биш биз дээ.Тэгвэл бидний бяцхан найзуудад дараагийн аялал гэж байх нь. Энэ удаа Жижгээ, Динза хоёр маань Хүннү гүрний цаг үед буюу хүлэг баатруудын дунд очих ажээ. Хүүхэд бүр жинхэнэ сэлэм гартаа барьж, нум сумаар харвахыг хүсдэггүй гэж үү? Тэгвэл Жижгээ маань сэлэм зүүж, бамбай барин баатрын хувцас өмсөөд жинхэнэ дайчин болдог гээд бод доо.  

Динза-10

Морьтон баатруудын цаг үед очсон Жижгээ, Динза хоёр маань Модун Шаньюгийн цэргүүдэд баригджээ. Динзад дурласан газрын омгийн охин, Хонгороо нар аюулд орсон найзуудаа аварч чадах болов уу? Тэдэнд ямар ч зэвсэг байхгүй бас энэ газрыг огт мэдэхгүй шүү дээ. Тэгвэл тэдэнд туслахаар хэн гарч ирэх бол? Өөдгүй муу сүнснүүд энэ удаа мөн л хорон муу санаагаа хэрэгжүүлэхээр Юда жанжны биед шингэнэ. Тэд ийнхүү эрх мэдлийг гартаа авснаар бяцхан найзуудад маань болоод нийт хүн төрөлхтөнд ямар гай зовлон тохиохыг төсөөлөхийн аргагүй болно.  

Динза-11

Жижгээ болон түүний найзууд аварга биет араатны эсрэг аймшиггүйгээр тэмцэж байна. Өрөвдөх сэтгэлгүй үлэмж биет араатныг бяцхан найзууд маань дарж дийлээсэй гэж та нар бодож байгаа биз дээ. Харин Хүннү гүрний дайчид Хан улсын их цэргүүдтэй дайтвал олон баатар эрс амь үрэгдэнэ шүү дээ. Тэгэхээр мэргэн Модун Шаньюй, Хан гүрний хааныг буулгаж авах ямар арга сэтгэх бол? Тиймээ, энэ бүх дайн тулаанд Динза, Жижгээ хоёр маань онцгой гавьяа байгуулах ажээ. Гол нь яаж вэ гэдэг нь л сонин байна. Хүлэг баатруудын цаг үеэс эргэн ирсэн Жижгээ, Динза хоёрт хөгтэй болоод санаа зовоосон олон асуудал урган гарах нь аргагүй. Учир нь хар санаат муу сүнснүүд энэ удаад дийлдсэн ч тэд бүр мөсөн устах болоогүй л байна.  

Динза-12

Чингис хааны цаг үед очсон Жижгээ, Динза хоёрын адал явдал үргэлжилсээр... Тиймээ, тэдний энэ удаагийн цаг хугацааны аялал илүү аюултай болоод хөгжилтэй байх нь лавтай. Учир нь тэд яхир муухай хөгшин цөөвөртэй цуг явсан шүү дээ. Түүхийн багш Хөгшин цөөвөр насаараа судалж, мэдсэн эртний баатруудаа нүдээр хараад яах бол? Түүний заадаг бүхэн бодит байдлаасаа хэр өөр болохыг Жижгээ таньж мэдээд юу гэх бол гээд олон сонирхолтой асуултын хариу энэ дэвтэрт багтсан байгаа. Үргэлж л муу зүйл сэдэж явдаг муу сүнснүүд энэ удаа арай Чингис хааныг хорлох гэхгүй байгаа даа. Бидний бахархал болсон Монголын эзэнт гүрний түүхийг тэд өөрчилчихвөл юу болохыг та нар төсөөлж байна уу?  

Динза-13

Эртний хаадын хатуу ширүүн тулаан дундаас сэргэлэн Жижгээ, хэрсүү Динза хоёр маань амьд мэнд гарч ирэх үгүй нь үнэхээр таашгүй асуулт болжээ. Харин санаа муут Хөгшин цөөвөр түүхийн үнэтэй эд баримт олж авах гэсэн шунахай сэтгэлээсээ салж чадахгүй л явна. Мэдээж шидэт сахиус бүгдийг харж байгаа болохоор Хөгшин цөөврийн ямар бодолтой явааг мэдчих байлгүй. Хайртай бяцхан баатрууд маань энэ үеийг хүртэл аймшигт араатан, атаат дайснаа ялан дийлсээр ирсэн юм чинь энэ удаа ч мөн ирсэн хэргээ бүтээнэ гэдэгт итгэж байна.  

Динза-14

Хүүхдүүд ээ, зоригт бяцхан найзуудын маань түүхэн цаг хугацааны аялал улам сонирхолтой бас аюултай болж байна. Муу ёрын сүнснүүдийн хар шидийн хүч үнэхээр аймшигтай ажээ. Гэхдээ хэн ялах нь одоогоор тодорхойгүй...  

Динза-15

Найзууд аа, Чингис хааны цаг үеэс дөнгөж гэртээ ирсэн Жижгээ, Динза хоёрыг маань ямар адал явдал хүлээж байгаа бол? Динзагаас болж сургуулийн жижүүрийг эмнэлэгт хэвтсэн гэж Хонгороо охин буруу ойлгожээ. Харин Динза, Жижгээ хоёр үүнийг ойлгуулж чадах болов уу? Гэтэл бяцхан баатруудыг маань үүнээс ч хүнд хэцүү даваа хүлээж байна. Ялагдсан муу сүнснүүд энэ удаа Жижгээ, Динза хоёроос гадна хүүхэд бүрийг зовлонд унагах аймшигтай төлөвлөөгөө сэдсэн ажээ...  

Динза-16

Найзууд аа, та нар Динза, Жижгээ хоёрын хамт Их Юан гүрний цаг үеэр аялахад бэлэн үү? Энэ өндөр хэрэм, цайз, сүрлэг, гоёмсог орд харш болон сонин, хачин ховор амьтдаар дүүрэн цэцэрлэгт хүрээлэн гээд нүд бүлтийлгэм гайхамшигтай зүйлс зөндөө ажээ. Гэтэл хааны ордон бүхэлдээ муу ёрын сүнсний хорлолд автаж, байдал маш аюултай болжээ. Муу сүнснүүдийн арга заль улам нарийсаж, хоёр найзын маань өмнөх саад бэрхшээл улам ихэссээр. Өмнө нь дандаа зорьсон хэргээ эрэлхэгээр бүтээдэг байсан Динза, Жижгээ хоёр маань энэ удаа яах бол?...  

Динза-17

Жижгээ, Динза хоёрын маань адал явдал улам сонирхолтой өрнөж байна. Үргэлж хамтдаа хорон санаатнуудын эсрэг тэмцдэг байсан бяцхан баатрууд маань өөрсдөө муу сүнсэнд хорлогдон сархдад согтуурсан учир дайснуудаа яаж ялах бол?! Нээрээ сайхан сэтгэлт Цагаан тэдэнд туслах болов уу?  

Динза-18

Бяцхан баатрууд маань ялалтанд хүрч чадлаа. Харин цаашид хорон санаатнууд юу сэдсэнийг таахад бэрх. Хубилай хааныг аврах гэж Жижгээ, Динза, Цагаан гурав хамаг хүч чадлаа шавхан хичээж байхад, Номхон тэргүүтэй Хубилай хааны талынхан манай гурвыг дайснуудаа гэж эндүүрэн араас нь нэхсээр арай л хороочихсонгүй. Гэтэл хайртай Динза маань шархдан, бүгд хүчин мөхөстөхөд аймхай байсан нэг найз маань зоригт баатар болж өөрчлөгдсөн нь үнэхээр бахархмаар байлаа. Ингээд цаашид Динза, Жижгээ, Цагаан гурав маань үргэлж хамт байхаар боллоо. Үүнд сайхан сэтгэлт Цагаан сүнс ихэд баяртай байгаа даа. Дараагийн удаа энэ гуравт маань илүү гайхалтай эсвэл аймшигтай ямар үйл явдал тохиолдох бол?...  

Динза-19

Хүүхдүүд ээ, хэрвээ манай ээж, аавууд биднийг хайрлахаа больчихвол ямар аймшигтай байх бол? Тэгвэл манай Жижгээгийн ээж, бас дэлхийн бүх ээжүүд гэр бүлээ хайрлахаа больчихно гээд бод доо. Энэ бол мэдээж муу ёрын сүнснүүдийн хийж байгаа ажил. Даанч энэ бүхний эсрэг Жижгээтэй хамт тэмцдэг байсан Динза одоо түүний дэргэд алга. Динза хаачсан юм бол? Зүггүй Динзад биелүүлэхийг маш их хүсч байгаа нэг хүсэл бий.  

Динза-20

Найзууд хамтдаа байхдаа хар хүчний эсрэг тэмцэх хамгийн их хүчтэй байдаг шүү дээ. Харин Динза, Жижгээ хоёр эргээд хамт байхын тулд ямар бэрхшээлийг туулах бол? Арай гэж эргэж нэгдсэн тэднийг урьд урьдынхаас хэцүү саад хүлээж байна. Мэдээж ээлжит бартааг давахын тулд Жижгээ, Динза, Цагаанаа гурав түүхийн бас нэгэн цагт очих болно. Тэдний очих цаг үед Жижгээ, Динза хоёрыг маш гайхам гэнэтийн бэлэг хүлээж байгаа.  

Динза-21

Хөгжилтэй найзууд маань Мандухай сэцэн хатны амьдарч байсан цаг үед иржээ. Дина, Сүндэр гээд тэдэнд туслах шинэ найзуудтай болсон. Ягаахан өнгөтэй хөөрхөн Динад Динзатай төстэй нэг чадвар бий. юу гэдгийг нь таах гээд үз дээ, найзууд аа. Тэднийг ордонтой танилцах зуур Монгол улсын хаан ширээний төлөөх далд тэмцэл ширүүн өрнөсөөр... Мандухай сэцэн хатан алтан ургийн хөвгүүнийг хаан ширээнд өргөмжлөх гэтэл хорон санаат Исмэл тайж, муу сүнснүүд ямар саад учруулах бол? Энэ бүхнийг энэ дугаараас уншаарай.  

Динза-22

Гайхамшигт адал явдлаар дүүрэн Динза, Жижгээ хоёрын цаг хугацааны аялал үргэлжилсээр...Хүн төрөлхтний ирээдүйг аврах үүрэгтэй хоёр найз маань энэ удаа Мандухай сэцэн хатны цаг үед ирсэн билээ. Тэдний байнгын дайсан болох муу ёрын сүнс дагасаар л явна. Мандухай сэцэн хатан манай найзуудтай нийлж Монгол улсын ирээдүйн бяцхан хаан болох долоон настай Батмөнхийг аврахаар явна. Тэдний замд муу ёрын сүнснүүд ямар ямар саад бэрхшээлийг бэлдсэн байгаа бол?  

Динза-23

Хүүхдүүд бидний хайртай баатрууд болох Жижгээ, Динза хоёрын санаанд оромгүй адал явдлууд үргэлжилсээр байна. Тэд Мандухай сэцэн хатантай нийлж, муу ёрын сүнсийг дарж, долоо настай бяцхан хүү Батмөнхийг хаан ширээнд өргөмжлөн, Алтан ургийн ариун хэлхээг аварч үлдэнэ. Гэвч харамсалтай зүйл нь Дина, Сүндэр хоёр тэднийг орхисон явдал юм. Шидэт сахиус, сайн санаат сүнсний тусламжтайгаар найзууд маань ахин уулзалдах болов уу? Тэднийг юу хүлээж байгаа бол...  

Динза-24

Найзууд аа. Та нарт Хонгороо, Жижгээ хоёрын шинэ стиль таалагдсан уу? Жижгээг охидууд сонирхож, Атаман Хонгороог уяраах гээд энэ анги сонирхолтой байлаа шүү тэ? Гэхдээ нэг зүйл санаа зовоож байна. Динза, Жижгээ хоёр хэзээ эвлэрч, хуучин хэвэндээ орох юм бол? Тэд нэг нэгнээсээ салсан учраас хүч нь их суларсан. Гэтэл муу ёрын сүнсний хүч улам бүр нэмэгдэж, заль мэх нь нарийссаар л байна...  

Динза-25

Найзууд аа, бидний таамаглаагүй олон сонирхолтой адал явдлууд өрнөсөөр л байна. Динза, Хонгороо хоёрыг юу хүлээж байгаа бол, муу ёрын сүнс олон дүрд хувирч, заль мэхээ гарамгай ашиглан шидэт сахиусыг өөрийн болгох гэж зүтгэсээр л байна. Бүх эрх мэдэл муу сүнсэнд шилжвэл яанаа. Гэхдээ тийм зүйл битгий л болоосой. Жижгээ, Чингүнжав хоёрыг муу сүнс маш амжилттай хуурсан...  

Динза-26

Түүхийн цаг үед Динзагүйгээр ганцаараа очсон Жижгээ өөрийн сахиусыг уламжлан хадгалагч Монголын эрэлхэг жанжин Чингүнжавтай учирч түүний амийг авардаг. Гэсэн ч хорон сүнсний муу санаа улам л нарийн бодлоготой болоод байгаа нь аймшигтай. Энэ удаа тэдний хорон санаа баатруудыг маань гэнэдүүлж дөнгөдөг. Энэ дэвтэрт эрэлхэг хүмүүс үнэхээр үхдэг үү? гэсэн асуултанд хариулт болох нэгэн гайхамшигт үйл явдал болно.  

Динза-27

Хүнд хэцүү бэрхшээлүүдийг даван туулсаар байгаа тэднийг амар тайван байлгахыг хорон санаат сүнснүүд хүсэхгүй байгаа нь мэдээж. Муу санаа сэтгэж олохдоо туйлын гарамгай сүнснүүд энэ удаа аргаа өөрчилж эрх мэдэлтэй, хүмүүст илүү их нөлөөлж чадах нэгэн хүний биед шингэнэ. Энэ нь хэн байсан хийгээд тэрээр бяцхан найзуудад маань ямар аюул заналыг авчрах тухай энэ цувралаас уншаарай.  

Динза-28

Найзууд аа, дотны найзуудын маань аялал гайхалтай адал явдлуудаар үргэлжилсээр байна. Муу ёрын сүнснүүд ч илүү хүчтэй, аймшигт санаа олныг бодсон нь мэдээж. Энэ удаа Жижгээ, Динза хоёр маань Нацагдорж, Бордук мөн алмас хэмээн нэрлэгдсэн шинэ найзуудтай болно. Тэд нэгэн хүчээр муу ёрын сүнснүүдийг устгаж чадах болов уу?  

Динза-29

Хүүхдүүд ээ, адал явдал хайгч хоёр анд маань цаг хугацаагаар аялсан хэвээрээ л байгаа. Тэднийг дагаад хорон санаат сүнснүүд ч аялж яваа нь мэдээж. Сүнснүүд энэ удаад Манжийн хааныг ашиглан Динза найзаар маань гал тахихаар завддаг. Сэргэлэн Динза тэдний гараас мултарч, амьд үлдэж чадах болов уу?  

Динза-30

Адал явдал хайгч Жижгээ, Динза хоёр маань хорон санаат сүнснүүдийн явуулгаар хөшөө болон хувирдаг. Тэд арван жилийн туршид хөдөө хэвээр байх болно. Үүнийг мэдсэн Сүндэр, Дина хоёр тэднийг аврахаар тэнгэрийн орноос шидэт ус авчирдаг. Гэсэн хэдий ч тэд шидэт усны ачаар урьдын хэвэндээ орж чадах болов уу?  

Динза-31

Цорын ганц сайхан санаат сүнс болох Цагаанаа маань энэ удаад муу сүнснүүдэд найзуудыгаа барьж өгөхөд тусалдаг. Яагаад тэр үүнийг хийх болов оо? Олон жил гүн нойронд автсан Жижгээ, Динза хоёр урьдын хэвэндээ орох хэдий ч тэднийг эргэн ирэхэд бүх зүйл утгаа алдаж, сүнснүүдийн ноёрхол хүчээ авсан байлаа...  

Динза-32

Жижгээ, Динза хоёр одоо үедээ эргэн ирдэг ч ээж, аав нь хөшөө болоод зогсохгүй хорон сүнснүүд хотыг бүхэлд нь эзлэх аюул нүүрлэсэн байлаа. Тэд ээж, аавыгаа болон хотоо бүхэлд нь аврахын тулд 1939 оны дайны цаг үед очдог...  

Динза-33

Дайны цаг үеэр аяласан найзууд маань эртний танил Алмас эгчийн гэрт ирдэг. Тэд түүнтэй уулзаж, эртний найз Нацагдорж, Бордухын талаар эмгэнэлтэй түүхийг сонсдог. Гэсэн хэдий ч тэд шинэхэн танил Жижгээгийн амийг аврах хэрэгтэй шүү дээ. Тэд чухам найзыгаа аврахын тулд ямар арга сэдэх бол?  

Динза-34

Хөгжилтэй найзууд болох Жижгээ, Динза хоёр маань яг өөрсдийг нь дуурайлган хийсэн хөөрхөн чихмэлтэй болдог. Түүгээр ч барахгүй тэд театрын амьдралтай танилцаж, олон сонирхолтой зүйлстэй учирна. Тэдний эртний танил Ариунаа эгч тэдэнтэй ижил чихмэлийг оёод зогсохгүй өөрийн бичсэн зохиолдоо амилуулан, театрчилсан тоглолт хийнэ...  

Динза-35

Эрэлхэг найзуудын маань аялал улам л хэцүү бэрхшээлтэй болж байна. Сахиусаа муу сүнснүүдэд алдсан тэд яаж ч хичээгээд өөрсдийн эртний танил Ариунаа эгч болон түүний хүү том Жижгээг аварч чадсангүй. Ийнхүү тэд гэртээ ирлээ. Аль хэдийн сүнснүүдэд эзлэгдсэн гэр орон, төрөлх хот... Тэд энэ бүхнийг аврах ёстой.  

Динза-36

Түрүүчийн аяллаас тэс ондоо хөгжсөн орчин үеийн хотоо хараад тэд гайхаж хоцордог. Үнэндээ энэ цаг үеийн муу ёрын сүнснүүд залхуу хойрго, идэмхий, уумхай байх сиймхийг ашиглаад монголчууд маань бүх талаар хөгжиж, боловсорч чадсан байдаг. Тэдний энэ удаагийн аяллын найз Гэгээ, Гээмаа хоёр охидтой хамт шинэхэн адал явдлыг туулахад бэлэн байна. Тэдний адал явдал юу байх бол? Цувралаа уншаарай найзууд аа!  

Динза-37

Жижгээ, Динзагийн шинэхэн найзууд болох Гэгээ, Гээмаа нарын ээжид нь аюулд тохиолджээ. Хорон муу санаатай хар сүнснүүд сэргэлэн охидын ээжийг сүнснүүдийн орон руу аваад явчихсан байлаа. Ээжийгээ алдсан хөөрхий охидод туслах шидэт сахиус хаана байгааг найзууд олж чаддаг. Энэ үеэр сүнсний оронд баатруудын ээжүүд өөр хоорондоо танилцаж дотносно. Увайгүй хар сүнснүүд ээжүүдээр муухай жорлонгоо угаалгаж зарцаа болгожээ. Үеийн дотны найзууд маань ээжүүдийгээ аварч чадах болов уу?  

Динза-38

Баатрууд маань сахиусны сургийг гаргасан ч сахиус тэдний төсөөлж ч чадамгүй хол газар гээгдсэн байдаг. Шантрашгүй найзууд сахиусыг олохоор сансар руу ч аялахад бэлэн байдаг ч өндөрт хөөрөхөөс өмнө ёроолгүй гүн рүү унах ёстой ажээ. Тэр нь юу юм бол? Тэднийг ямар сорилт угтах бол?  

Динза-39

Дотны найзууд сахиусны сургийг гаргахаар сансарт ниссэн шүү дээ. Тэгвэл тэдний сахиусыг харь гарагийнхан хамгаалж байсан гээд боддоо. Үүнийг мэдсэн баатрууд маань гайхах, баярлах зэрэгцдэг. Харин хар сүнснүүд тэднийг болон сахиусыг гартаа оруулах хорон санаагаа хэрэгжүүлэхээр араас нь ниснэ...  

Динза-40

Сансарт өрнөх сонирхолтой тулаанд харь гарагийнхан тусалдаг. Хорон сүнснүүд ялагддаг ч тамын хатны хорт могой Жижгээг маань хатгаж үхэлд хүргэдэг. Хөөрхий Жижгээ эргэн амьдрах болов уу? Түүнийг хэн аврахыг энэхүү цувралаас уншаарай.  

Динза-41

Дотны найзууд хуучин цаг үеэсээ ирнэ. Тэднийг ирэхэд сүнсэн аав, ээжүүд өөрчлөгдөөгүй байх хэдий ч сэргэлэн Динза маань сахиусны ачаар хүүхдүүдийн ээж, аавыг эргүүлэн авчрах арга олно. Энэ нь чухам ямар арга юм бол?...  

Динза-42

Цаг хугацаагаар зорчигч Динза, Жижгээ хоёр Монголын түүхийн бас нэгэн чухал үед очдог. Харин хар санаат сүнснүүдийн хаан, хатан хоёр тэдний араас алдалгүй мөшгөсөөр ээлжит хорон төлөвлөгөөгөө сэднэ. Ингээд эрэлхэг хоёр найз маань энэ цаг үед ямар адал явдалтай учрахыг энэ дэвтрээс уншаарай.  

Динза-43

Сахиус хадгалагчийн хамтаар муу ёрын сүнснүүдийг дийлсэн Динза, Жижгээ хоёр ер бусын галт тэрэг хөлөглөн өөрийн цаг үе рүүгээ буцдаг. Гэхдээ чухам хаана ирэх бол? Харин яг энэ үед сүнснүүдийн хаан, хатан хоёр Хар шидтэний тусламжтайгаар дэлхийг эзлэх цорын ганц боломжийг эрнэ. Шидэт сахиусын хэлснээр, тэднийг зогсоохын тулд баатрууд маань 200 наст удган эмээтэй уулзах ёстой. Тэд чадах болов уу? Энэ мэт оньсого дүүрэн асуултын хариуг бяцхан уншигч та нар минь шинэхэн дэвтрээсээ олж мэдээрэй.  

Динза-44

Хар шидтэн өвгөн хамаг л хүчээ дайчлан олон сая жилийн өмнө мөхсөн үлэмж биет динозаврууд одоо цагт хаана ирэхийг мэдэж чаддаг. Ингээд зогсохгүй динозавруудыг эргэн ирүүлэхгүй байх цорын ганц арга замыг мэдэж авсан Сүнснүүдийн хаан, хатан хоёр хар хослолтой хүмүүсийн дүрд хувирч хамгийн сүүлчийн хорон төлөвлөгөөгөө эхлүүлнэ. Энэ үеэр гүн нойрссон Динза, Жижгээ хоёрыг сэрээхээр 200 наст удган эмээ мөнх хөх тэнгэртээ залбирдаг. Тэд сэрэхгүй бол хүн төрөлхтөнд аюул учрах болно...  

Динза-45

Удган эмээгийн ачаар гүн нойрноос сэрсэн Динза, Жижгээ хоёр гэртээ эргэж ирдэг. Гэтэл тэдний хот нэг л эл хуль байлаа. Хаалга нь нээлттэй газар хаана ч байсангүй. Хотын оршин суугчид хар нүх ухахаар хаа нэг тийш оджээ. Энэ бүхнийг муу ёрын сүнснүүдийн хийж байгаа ажил гэдгийг мэдэх манай баатрууд Байгалийн түүхийн музей орж шидэт сахиустай уулздаг. Сахиус тэдэнд бүх цаг үеийн баатруудаас тусламж хүсэж чадвал энэ цаг үеийг аварч чадна хэмээн зөвлөнө. Харин тэдэнтэй яаж холбогдох бол?  

Динза (46 бүтээлт цуврал)