Бөгжний барилдлага бол Ж.Р.Р.Толкины Бөгжний эзэн хэмээх XX зууны уран сэтгэмжийн яруу тод, алдар суут сод бүтээлийн тэргүүн дэвтэр билээ.Эл ботид Шаир нутгийн нам жим буйдхан тосгоноо суух Фродо Баггинст хөгшин ах Билбо нь өөрийн бөгжөө найдан өвлүүлснээр маш их хариуцлагын эзэн болж байгаагаар үйл явдал эхэлдэг. Улмаар Фродо гэр орноо орхиж, аюулыг сөрөн Дундад газрыг хөндлөн гулд туулж Үйлийн гавд очин бөгжийг устгаж харанхуйн эзний бузар санааг эцэс болгох үүрэг хүлээнэ. Хоббит зохиолын нэгэн адил энэ зохиолд ч бас гол баатар өөрт ахадсан гэмээр даалгавартай учрах ч үйл явдал өрнөх тусам эр зориг, овсгоо самбаа болон анд нөхдийнхөө тусламжтайгаар улам бүр өсөж хөгжинө.Толкин хүүхэд ахуй наснаасаа л эртний болон дундад зууны үеийн үлгэр домгуудыг ихэд сонирхож, Дундад газар хэмээн нэрийдсэн үлгэр домгийн ертөнцийг өөрийн төсөөлөлдөө бүтээж эхэлсэн ажээ. Тэрхүү ертөнц нь тун ч нарийн зураглал бүхий байгаль газар зүй, түүхтэй агаад хүмүүсээс гадна хоббитууд, элфүүд, одойчууд, гоблинууд гэх зэрэг өвөрмөц оршин суугчид, тэр бүү хэл өөрийн гэсэн тусгай хэлтэй.Бөгжний эзэн хэмээх энэхүү гурамсан бүтээл анх гарсан цагаасаа дэлхий даяар 150 сая гаруй хувь хэвлэгдэж, XX зууны хамгийн алдартай уран зохиолын бүтээлүүдийн нэгд тооцогдох болсон юм. Тиймээс ч Ж.Р.Р.Толкиныг орчин үеийн зөгнөлт уран зохиолын төрлийн эцэг хэмээн зүй ёсоор тооцдог бөгөөд түүний бүтээлүүдийг эртний болон дундад зууны үеийн агуу туульсын зохиолуудтай жишин үзэхэд ч буруудахгүй билээ.

Бөгжний барилдлага

&quot;Хоёр аранга&quot; бол Ж.Р.Р.Толкины XX зууны уран сэтгэмжийн сод бүтээл &quot;Бөгжний эзэн&quot; цувралын дэд дэвтэр бөгөөд “Бөгжний барилдлага” тэргүүн дэвтрийн үргэлжлэл юм.Эхний дэвтэр уншигч биднийг Тонж бэлзгийг Үйлийн гавт аваачин устгах чухал үүргийг хүлээсэн бөгжний барилдлагын гишүүдтэй танилцуулдаг. Санаанд оромгүй аяллын түүх, айдас, эр зоригийн эн тэнцүү хүч бяцхан хоббитуудын дотор хэрхэн хуралдаж, аюултай замаас чөлөөлөн амар тайванд хүргэх анд нөхөд ямагт итгэл найдварын гэгээ болон тосдог болохыг тус номоос уншсан билээ. Харин дэд дэвтэрт нөхөрлөл, үнэнч шударга зангаараа холбогдож хүнд хэцүүг туулах даалгавар хүлээн авсан бөгжний барилдлага дийлдэшгүй, бузар муутай нүүрэлдсэнээр тарж бутран гишүүн тус бүр өөрсдийн туулах ёстой сорилт, бэрхшээлтэй тулгарна. “Хоёр аранга” нь өмнөх номын төгсгөлөөс шууд үргэлжилж, хоёр талд өрнөх түүхийг хүүрнэдэг. Арагорн, Леголас, Гимли нар Роханы уудам талаар олзлогдсон нөхдөө хайн цуцаж унатлаа нэхэн бэдрэх бол, Фродо, Сэм хоёр амь насаа дэнчин тавьж алхам тутамд аюулын салхи өөдөөс нь үлээх Мордорын газар нутаг руу нэвтрэхээр оролддог. Дайснаас ирэх аюул занал урьд хожид байгаагүйгээр нэмэгдэж, Дундад газрын хувь заяа дээсэн дөрөөн дээр дэнжгэнэнэ.

Хоёр аранга

&quot;Хаан эргэж ирсэн нь&quot; бол Ж.Р.Р.Толкины Бөгжний эзэн-ий баатарлаг дуулийн төгсгөл хэсэг юм. Бөгжөөр хувь заяагаа холбосон нөхөд зорьсондоо хүрэхийн тулд эрхгүй өөр өөрийн бэрх замыг туулсаар. Эртний өрнийн дээдсийн нуугдаж явсан залгамж гэдгээ илчилсэн Арагорн Роханы хүлэг баатадтай нэгдэн Изэнгардын эсрэг тэмцэж, Бүрээт хотын үнэт ялалтад хувь нэмрээ орууллаа. Оркуудад олзлогдсон Мэрри, Пиппин хоёр Фангорн ой руу оргож, тэндээ энттэй учрав. Гайхамшиг үзүүлэн Гандалф эргэн ирж, хорон шидтэн Саруманыг дарлаа. Тэр хооронд Сэм, Фродо хоёр бөгжийг устгахаар Мордорыг зорих замдаа “эрдэнэ”-ээ хайсаар, тэмүүлсээр буй Смиагол/Голлумтай таарчээ. Үлэмж аалз Шэлобтой тулалдсаны дараа Сэм нөхрөө үхсэнд эндүүрэн орхих авч Фродо оркуудын амьд олз болчхов. Энэ зуур харангуйн эзний их цэрэг улам олширсоор, томорсоор. Энэ хэвлэлийн бичгийг Христофер Толкинтой хамтран сэргээн найруулж, залруулсан бөгөөд Аллан Лигийн усан будгаар амилуулсан арван таван зургийг хавсаргав.

Бөгжний эзэн (3 бүтээлт цуврал)