Тухайн үед холбогдох түүхэн зохиолын дотор зохиогч нь үл мэдэгдэх &quot;Алтан товч&quot; (qaγad-un ündüsün-ü quriyangγui altan tobči neretü sudur) онцгой байр суурь эзэлдэг. Эл зохиолыг бичсэн он цагийг тодруулахад амаргүй боловч, тус сурвалжийг судалж, зохиогдсон он цагийнх нь тухайд дэвшүүлсэн эрдэмтдийн саналыг үндэстэй хэмээн үзэж болохоор байна. Тэдгээр эрдэмтний үзсэнээр зохиогч нь тодорхойгүй &quot;Алтан товч&quot;-ийг 1604 оноос өмнө зохиосон байж таарахгүй. Учир нь, &quot;Алтан товч&quot;-д өгүүлж буй үйл явдал Лигдэн хаан (1604) ор сууснаар төгсөж буй билээ... &quot;Алтан товч&quot; бол өгүүлэн буй цаг үед холбогдох монголчуудын түүх бичлэгийн онцгой содон бүтээл билээ. Тэмдэглүүштэй нэгэн зүйл нь тэрхүү түүхэн цаг үед монголчуудын түүхээ сонирхон судлах явдал огтхон ч багассангүй, харин ч ихэссэн ажээ.

Хаадын үндсэн хураангуй Алтан товч

Өвөг дээдсийн маань идэрхэг хүчирхэг үе хийгээд эв эе эвдэрч, эргэж хөрвөж явсан түүхийг хүүрнэн өгүүлсэн туужис дундаас Лувсанданзаны &quot;Алтан товч&quot; нь ЮНЕСКО-гийн &quot;Дэлхийн дурсамж&quot; хөтөлбөрийн олон улсын зөвлөлдөх хорооны ээлжит Х бага хурлаас дэлхийн хосгүй үнэт баримтат өвөөр бүртгэгдсэн байна.

Эртний хаадын үндэслэсэн төр ёсны зохиолыг товчлон хураасан алтантовч хэмээх оршвой

&quot;Шар тууж&quot; нь Манжийн дарлалд орохоос өмнө Халхад зохиосон байх бүрэн магадтай сурвалжийн хувьд эрдэмтдийн сонирхлыг онцгой татаж байгаа билээ... &quot;Шар тууж&quot; бурхны шашны зохиолын уламжлал ёсоор хүн төрөлхийтэн төдийгүй сав ертөнцийн үүсэл гарлын тухай товч өгүүллээр эхэлсэн байдгаараа онцгой юм... Зохиолын үндсэн хэсэг буюу өнө эртнээс эхлээд тус зохиолыг бичсэн цаг үе хүртэлх Монголын түүхийн хэсэг зохиогчийн бичсэн лүгээ тун ойр байгаа юм. Бичвэрийн үндсэн хэсэг болох Чингис хаан, түүнийг залгамжлагсдын түүхийг товч тэмдэглэсэн нь зохиолын нэгэн онцлог юм.

Эртний монголын хаадын үндэсний их Шар тууж

Саган сэцэний &quot;Эрдэнийн товч&quot; бол XVII зууны сүүлч үеийн Монголын түүх бичлэгийн эн их дурсгал билээ... Саган сэцэний зохиол өнө урт хугацааны турш монголчуудын дунд алдаршин түгэхдээ, Монголын бүх нутагт гар бичмэлээр өргөн тархаж, бичгийн боловсролтон нар хамгийн ихээр уншиж асан номын нэгэн болж байв... XVII зууны Монголын нэрт түүхч Саган сэцэний зохиолын монголчуудын түүхийн мэдлэгийг хөгжүүлсэн хувь нэмрийг зөвхөн МНТ-ныхтой жишин үзэж болох юм.

Хаадын үндэсний Эрдэнийн товч

Мөнхүү үед түүхийн он дараалсан бичгийг Монголын өмнөд хэсэг төдийгүй, Халхын нутагт ч зохиож байжээ. &quot;Шар тууж&quot; хийгээд Халхын түүхч Асрагчийн бүтээл бэлхнээ үүний нуталгаа болж байгаа юм. Асрагч нэрт түүхэн зохиолоо бичихдээ, Чингис хааны дээд өвгийн түүхийг хураангуйлж, улмаар Чингис хааны үеийн түүхийг өгүүлэхийг зорьсон байж болох юм... Харьцуулсан судалгааны явцад &quot;МНТ&quot;-ы 282 зүйлийн 90 нь ямар нэгэн байдлаар &quot;Асрагч нэртийн түүх&quot;-д тусгагдсан буй сонирхолтой баримтыг бид тогтоосон билээ... &quot;Асрагч нэрт&quot; түүхэн зохиолоо Хангайн нурууны Онгийн голын орчим зохиосон (хуучин Сайн ноён хан аймгийн төв хэсэг буюу одоогийн Өвөрхангай аймгийн хойд хэсэг) ажгуу.

XVII зууны Монгол түүхэн сурвалжийн тулгуур эхүүд (5 бүтээлт цуврал)