'Хатагтай Перегриний онцгой хүүхдүүдийн асрамжийн газар'-аас эхлэн 'Хоосон хот'-оор үргэлжилсэн адал явдал 'Сүнснүүдийн номын сан'-д төгсөж байна. Номын эхэнд ер бусын хүчирхэг чадвараа олж нээсэн Жэйкоб харуул хамгаалалт өндөртэй цамхгаас найзуудаа аврахаар түүхэн цаг үед аялна. Түүнтэй хамт гарын хуруунаасаа гал гаргадаг Эмма Блүүм, онцгой хүүхдүүдийн үнэрийг танигч нохой Аддисон Мак Хенри байх болно.  Тэд орчин үеийн Лондонгоос Викториагийн үеийн аймшигт ядуусын хороолол болох Чөтгөрийн талбайд очно. Энэ л газарт онцгой хүүхдүүдийн хувь тавилан бүрмөсөн шийдэгдэх юм. Өмнөх номын нэгэн адилаар 'Сүнснүүдийн номын сан' ч өмнө нь хэвлэгдэж байгаагүй хуучны зургуудын хамтаар таны гэгээн мэлмийг мялааж байна.    

Сүнснүүдийн номын сан

ХОЁРДУГААР ХЭСЭГ  Хэрэв хэн нэгэн 08:30-ийн галт тэрэг зогсоол дээр ирэхийг анхааран харсан бол ямар ч онцгой зүйл олж харахгүй байлаа. Хаалга онгойлгох тасалбар шалгагчид, галт тэрэгнээс буух цэргийн хувцастай эрэгтэй, эмэгтэй хүмүүс, нэгдүгээр зэрэглэлийн галт тэрэгнээс буугаад, гэнэтийн их дуу чимээнд орон цочирдож, нуруу нуруугаа харуулан тойрон зогссон найман хүүхэд гээд бүх зүйл энгийн байсан юм.  Энгийн нэг өдөр төөрч ядарсан шинжтэй ийм хүүхдүүд дээр хэн нэг сайхан сэтгэлт хүн ирээд гэр нь хаана байдгийг, ээж аав нь хэн гэдгийг асуух байлаа. Гэвч галт тэрэгний буудал дээр хэдэн зуун ядарч, төөрсөн хүүхдүүд байв.  Тиймээс хэн ч бор үстэй, товчтой гуталтай бяцхан охины хөл газар хүрэхгүй байгааг анзаарсангүй. Мөн хэн ч цонхигор царайтай хөвгүүний амнаас нэгэн зөгий нисэн гарч ирээд, агаар амталснаа буцаад ам руу нь нисэн орохыг ажигласангүй.  Хэн ч нүдэн доор нь хар цагираг татсан хүүгийн халааснаас шавар цэрэг гарч ирэн, эргэн тойрноо ажиглахад хүү түүнийг хуруугаараа буцаан түлхэхийг харсангүй. Түүнчлэн хар дарж зүүдлэх вий гэж айсандаа хэдэн шөнө унтаагүй, ёслолын малгай, гоёлын хүрэм өмссөн хүү ч хэнд ч анзаарагдсангүй.  Нэг ч хүн цув, даашинз өмссөн, маш том чемодан чирсэн биерхүү охин руу хялам хийсэнгүй. Нэг ч хүн түүний чемодан асар хүнд байгааг, нэг талдаа жижигхэн нүх цоолсон байгааг анхаарч үзсэнгүй. Тэр ч байтугай дулаахан намрын өдөр цувныхаа малгайг өмсөж, нүүрээ ороолтоор таглан хуруу дарам арьсаа ил гаргаагүй хүүг ч анхаарсангүй.  Тэгээд бас хэний ч анхаарлыг татахааргүй, гэхдээ бүх хүнийг өлмий дээрээ зогсоод ажиглаж буй Америк хүүг нэг ч хүн харсангүй. Харин түүний хажууд зогсох охин алгаа хавсарч, дотор нь гал нуух бөгөөд, үе үе хурууных нь завсраар гал цухалзах аж. Тэр хуруугаа чүдэнз унтраах гэж байгаа юм шиг сэгсэрснээ, үлээж үзлээ. Тэгээд ч унтрахгүй болохоор нь хуруугаа амандаа хийгээд, хамраараа утааг нь гаргав. Гэвч тэрийг ч хэн нэгэн анзаарч харсангүй.  Хэн ч 08:30-ийн галт тэрэгнээс бууж ирсэн найман хүүхдийг ажиглаж, ямар нэг онцгой зүйл анзаарсангүй...  

Хоосон хот

Хатагтай Перегриний шинээр бүтээсэн гогцооны ачаар хайртай охин болон найзуудтайгаа байнга уулзах болсон нь Жэйкобын хувьд зүйрлэшгүй сайхан хэрэг байлаа. Дөчхөн секундын дотор арын хашаанаасаа XIX зууны Лондонд очих гайхалтай биш гэж үү! Сүнснүүдийн номын санд байгуулсан гавьяагаараа Чөтгөрийн талбайд алдаршсан Жэйкобд имбринүүдийн зүгээс онцгой хүмүүсийн урам зоригийг сэргээх илтгэл тавихыг санал болгосон ч тэр татгалзав. Харин өвөөгийнхөө нэгэн адилаар онцгой хүүхдүүдийг хоосон зүрхт мангасаас аварч, аюулгүй гогцоонд хүргэхээр шийднэ. 'Өдрүүдийн газрын зураг'-аар баримжаалсан Жэйкоб ба түүний нөхөд энэ удаа онцгой чадвартай охины эрэлд гарах нь ээ.  

Өдрүүдийн газрын зураг

Шувуудын чуулган

Энэхүү зохиол нь “Нью-Ёорк Таймс”-ын бестселлер номын жагсаалтад 51 долоо хоногийн турш бичигдсэн шилдэг борлуулалттай ном юм. Рэнсом уг бүтээлдээ аймшгийн гэмээр сонин дүрслэл бүхий зургуудыг оруулж өгсөн нь энэ номын бас нэгэн чимэг болж өгчээ. Жэйкобд өвөө нь үл итгэм гайхамшигт түүхүүд ярьсаар л... Хүү өсөж томрохын хэрээр тэдгээрт итгэхээ больж эхэлнэ. Гэнэт нэгэн өдөр өвөө нь хачин амьтны дайралтад өртөж ,сүүлчийн амьсгалаа хураах мөчдөө ач хүүдээ үл мэдэгдэх үгсийг захиж үлдээнэ. Хүү цусанд хутгалдсан өвөөгийнхөө дэргэд аймшигт араатанг олж харна... Гагцхүү Жэйкобд л харагдах тэр чухам юу байв? Хүү өвөөгийнхөө сүүлчийн захиасыг биелүүлэхээр аялалд гарахаар зориг шулуудав. Түүнд чухам юу тохиолдох бол? Зангилаа нь тайлагдахгүй учир битүүлэг асуултууд ар араасаа хөвөрсөөр...  