Дэлхийг бүхэлд нь титанууд эрхшээх болжээ. Тэдний идэш болж буй хүн төрөлхтөн амьд мэнд үлдэхийн тулд эрх чөлөөгөө хязгаарлаж, хана хэрэм босгоцгоов. Гэвч үлэмж титан хэрмийн дээгүүр өнгийх төдийд хүн төрөлтний “амар жимэр” амьдрал дуусаж, ядаж цөхөн тэмцэнэ.Зохиогч Хажимэ Исаяама зохиолыг нь бичиж, өөрөө зурж бүтээсэн 34 цуврал бүхий энэ манга уншигчдын гарт хүрснээр эрхлэн гаргасан хэвлэлийн газрынхаа 18 жилийн ажлын замналыг огцом орлоготой “золгуулсан” гэдэг. Дийлдэшгүй хүчний өмнө хүчгүй дорой тал хэрхэн цөхөрч буй явдлыг өгүүлэх энэ манга ганц Японд ч биш дэлхий дахинаа шуугиан дэгдээж, олон хэлээр орчуулагдан гарах болов. Тэдгээр улс бүр зохиолыг өөр өөрийн өнцгөөс харан, үйл явдал болон дүрүүдийн метафор утгыг өөр өөрсдийнхөө нөхцөлд тохируулан тайлбарлах гэж зүтгэцгээх болсон нь үзэл бодлын ертөнц дэх зөрчлүүдийг улам дэвэргэсэн гэж болно. Япон улсаас гаралтай манга хэмээх ном хэвлэлийн харьцангуй шинэ төрлийг анх удаа албан ёсны эрхтэйгээр Монгол уншигчдад хүргэх ажил энэхүү алдарт цувралаар эхэлж байна.

Давшигч Титан 1

Ирэн бэлтгэл салааны цэрэг болж, нөхдийн хамт титануудын эсрэг тэмцэж эхлэв.Үлэмж титан хэрэм рүү довтолсноор бусад нь үер мэт урсан орж ирлээ. Тулааны үеэр Ирэн дотнын нөхөр Арминд туслах гэж оролдсон хэдий ч өөрөө титаны идэш болж орхив! Хангамжийн салааныхан хаашаа ч хөдлөх аргагүй болсон тул тэргүүн болон арын шугамынхныг шаардлагатай хэрэгслээр хангаж чадсангүй. Тулалдаж байгаа цэргүүд юу ч үгүй болж, аргаа барсан ч амьд үлдэхийн тулд эрсдэлтэй ч гэлээ эцсийн аргаа ашиглан тэмцэхээр шийдлээ.

Давшигч Титан 2

Үлэмж титан гарч ирснээр хэрэм сүйдэж, тоолохын аргагүй олон титан түрэн орж ирлээ. Микаса титануудыг толгой дараалан устгаж явсан ч Ирэн идүүлснийг дуулаад цочирдсондоо бууж өгөв. Тэгтэл бусад руугаа дайран үгүй хийдэг үл мэдэх нэгэн титан гэнэт гарч ирэн Микасаг гарцаагүй үхлээс аврах нь тэр. Үл таних титан асар олон титаныг цааш нь харуулчхаад тамирдан унах аж.

Давшигч Титан 3

Ирэн Титан болж хувираад Рөүз хэрмийн цөмөрсөн нүхийг хадаар бөглөх төлөвлөгөө нурахын даваан дээр Армины хүчинд амжилттай болж чадлаа. Тэглээ гээд Титан болж хувирдаг цэрэгт бүгд итгэнэ гэсэн үг биш. Дээр нь тэр Титан болж хувирсныхаа дараа Микасаг ч танихгүй алахыг завдсан. Одоо түүнийг хэрхвэл дээр тухай цэргийнхэн хүртэл өөр хоорондоо маргалдах боллоо.

Давшигч Титан 4

Титан болон хувирсан Ирэний ачаар Рөүз ханын трост тосгоныг буцаан авлаа. Даалгаврыг амжилттай биелүүлмэгцээ Ирэн ухаан балартан унав. Харин эргээд сэрэхэд нь туршуулын албаны командлагч Эрвин Смит хүлээж байх нь тэр. Тэрээр Титануудыг нууц оршиж байгаа гэх Ирэний төрсөн нутгийг судална, мөн түүний тулд Ирэний хүч хэрэгтэй гэж хэлэх боловч...

Давшигч Титан 5

Туршуулын алба Ирэний төрсөн гэрээс Титаны нууцыг олж илрүүлэх даалгавартайгаар хэрмээс гадагш гарав. Туршуулын албаны бусад гишүүд, түүн дотор Армин, Микаса нар ч хамт яваа. Бүх зүйл санаснаар болж байтал Армины өмнө эмэгтэй Титан гэнэт гарч ирснээр хамаг төлөвлөгөөг бусниулж орхив...

Давшигч Титан 6

Ирэний төрсөн гэрт бий гэх Титаны нууцыг олох даалгавартай туршуулын алба хэрмийн гаднах ажиллагааны үеэр оюун ухаантай эмэгтэй Титантай таарав. Үүрэг гүйцэтгэж явсан салаа тэр чигтээ сүйдэх аюул тулгарсан ч командлагч Эрвиний төлөвлөгөөгөөр эмэгтэй Титаныг барьж авч чадлаа. Одоо дотор нь хэн байгааг мэдэх л үлдэв.

Давшигч Титан 7

Ахмад Леви “эмэгтэй титан”-ы гарт нөхдөө алдаж, дараа нь өөрөө нүүр тулсан ч бас л ялагдав. Микаса, Леви хоёр хар хурдаараа хүрч ирсний ачаар “эмэгтэй титан”-ы амнаас Ирэнийг салгаж чадсан ч баривчилж үл чадав. Хэрмийн гаднах ажиллагаа бүтэлгүйтсэн тул Ирэн болон түүнтэй холбоотой этгээдүүд нийслэлд дуудагдлаа...

Давшигч Титан 8

Ирэн мөр зэрэгцсэн нөхдийн хамт &quot;эмэгтэй титан&quot;ыг арайхийн барьж авч чадлаа. Гэвч хана дотроос өөр нэг тайлагдашгүй нууц гарч ирж, тэдний өмнө шинээр тулгарав. Үймээн самуун, эмх замбараагүй байдалтай зэрэгцэн Рөүз хана цөмөрсөн тухай шуурхай мэдээ ирэх нь...

Давшигч Титан 9

Рөүз ханын ойролцоо гэнэт бүлэг Титан гарч ирнэ. Титанууд хаанаас гарч ирээд байгааг илрүүлэхээр 104-р салааг оролцуулсан туршуулын албаныхан Рөүз ханын дэргэдэх Утгард цайзад шөнийг өнгөрүүлнэ. Шөнийн цагаар Титанууд хөдөлж чаддаггүй байтал санаанд оромгүй явдал болж, цайз бүслэгдлээ.

Давшигч Титан 10

Рөүз ханын ойролцоо сүрэг Титан гэнэт гарч ирэв. 104 дүгээр бэлтгэл салааныхан Юмирын зүтгэл, Ирэний тусламжтай сүрэг Титаны дайралтыг тэсэж амь гарч чадлаа. Гэсэн хэдий ч үлэмж, хуягт Титануудын үнэн төрх ил болсноор тэд хорвоогийн нарыг харах хугацаа бага үлдсэнийг ойлгов...!

Давшигч Титан 11

Үлэмж, хуягт Титануудын үнэн төрх илчлэгдсэнээр барахгүй тэд Юмир, Ирэн хоёрыг хулгайлан зугтав. Туршуулын салаа тэднийг аврахаар шуурхай ажиллаж эхэллээ. Харин Ирэн, Юмир хоёрын дунд эргэж нөхөгдөшгүй ангал үүсжээ.

Давшигч Титан 12

Рэйнр, Бэртолт хоёр Ирэн, Юмир хоёрыг хулгайлан төрөлх нутаг руугаа авч буцахыг оролдов. Туршуулын алба Ирэнийг буцаан авахын тулд яаралтай давшилт зохион байгуулсан ч хариуд нь асар өндөр төлөөс төллөө. Юмир сонголтоо хийж, Рэйнр болон бусадтай нь үлдэх нь тэр.

Давшигч Титан (34 бүтээлт цуврал)