Монголын ард бүхэн өөрсдийн улс үндэстний түүхийн явдал ба өөрийн газар шорооны эрхэм чухлыг мэдэж ухах болбоос монгол хүн бүр улс төр, үндэс угсаа, газар шороогоо хамгаалах санал бодлоготой болох амуй... энэ түүхийг зохиохдоо Монголын түүхийг шинжлэх ухааны үүднээс магадлан боловсруулах гэсэн буюу шинжлэх ухааны эрдэмтний үзэх хэрэглэхэд зориулсан нь огт бус, гагцхүү монгол ардуудын уншиж танилцах ба Монгол улс үндэсний явдал хэрэгт тус нөхвөр болох зорилтын үүднээс бичсэн болохыг дахин сануулмуй.

Монголын гээгдсэн түүх 1

1963 онд Католик шашны лам нар нэрт эрдэмтэн Галилео Галилэйг дэлхий бөөрөнхий гэж хэлснийх нь төлөө шүүж, бурууг нь хүлээлгэж байхад түүнээс 400 жилийн өмнө 1267 онд Хүлэгү хаан ах Хубилай хаанд дэлхийн бөмбөрцгийн загвар бэлэглэж байв. 1445 онд Германы инженер Иоханнэс Гүтэнбэрг анх бараар ном хэвлэснийг дэлхийн хэвлэлийн салбарын эхлэл гэж тооцдог бол монголчууд түүнээс 100 гаруй жилийн өмнө модон бараар ном судраа хэвлэдэг, 1380 онд төмөр бараар хэвлэсэн, дэлхийн хаана ч хөрвөх чадвартай цаасан мөнгийг хэвлэн гаргасан байжээ. Гэтэл цаасан мөнгө Европт бүр XVII зуун хүрч байж эргэлтэд орсон байдаг. Оросын мөнгө буюу деньги гэдэг үг монгол хэлний тамга гэдэг үгнээс гаралтай. Хятадын мөнгөн тэмдэгт болох юань нь Монгол Юань гүрний цаасан тэмдэгтийн нэр болохыг та бид мэддэггүй. Энэхүү номд дурдагдсан сэдвүүд бүгд дараа дараагийн эрдэм шинжилгээ, судалгааны бие даасан томоохон сэдвүүд болох бөгөөд буурал түүхийн эргэлтэд мартагдан гээгдсэн эдгээр хуудаснуудын гарчгийг л зохиогч бээр тавьсан гэхэд хилсдэхгүй биз ээ. Монголын гээгдсэн түүх цувралыг бичсэний гол зорилго нь уншигч та монголчуудынхаа түүхийн гээгдсэн хуудаснуудтай танилцаж, цаашид дэлхийн түүхэнд арилшгүй ул мөрөө үлдээсэн өвөг дээдсийнхээ түүхийг сонирхон, гүнзгийрүүлэн уншиж, судлах эрмэлзэл төрүүлэх гэснийх билээ.

Монголын гээгдсэн түүх 2

Монголын их талаас гаралтай, бидний өвөг дээдэс жужанчуудын үлдэгдэл аваарчууд гурван зууны туршид Дорнод Европыг донсолгож, Дорнод Ромын эзэнт гүрнийг ганхуулж явсан бол Их Монгол улс болон түүний залгамжил улсуудын үед монгол хаадын хатад болсон Ромын гүнж нарын ачаар энэхүү эзэнт гүрэн сүйрлээс хэрхэн аврагдсан тухай бид тэр болгон сонсоогүй буй заа. Зүүн Азийн хувь заяаг шийдсэн атлаа түүхэнд мартагдан орхигдсон Үнэгэн давааны байлдаанд монгол цэргийн байлдааны шалгарсан тактикууд хэрхэн хэрэглэгдсэн, Германы фельдмаршалууд монгол цэргийн байлдааны урлагийг сонирхон судалж байсан, Их Монгол гүрнийг байгуулахад бүх насаа зориулсан ялагдашгүй алдарт Сүбээдэй баатар түүхэнд яагаад мартагдан орхигдсон, Монгол-Бирмийн хэд хэдэн дайн дэлхийн түүхийн хуудаснаа гээгдсэн учир шалтгаан гээд бидний үл мэдэх сэдвүүд олон. XIII зуунд монгол цэргийн хэрэглэж байсан байлдааны стратеги, тактикийг тэртээ хожим ХХ зуунд л онолын үндэстэй болгон боловсруулж, саяхан болтол НАТО буюу Умард Атлантын Гэрээний байгууллагын цэргийн онолын үзэл баримтлал болгон хэрэглэж байсныг бид тэр болгон мэдэхгүй. Монголчууд тахлыг зэвсэг болгон хэрэглэснээс үүдэн Европт аймшигт хар тахал тархсан мэтээр хэдэн зуун жилээр ташаа ойлголт түүхчдийн дунд үлдсэн, Өгэдэйн улсыг сэргээхээр их хаан Хубилайн эсрэг насаараа тэмцсэн Хайду хан, хээрээр тэнэж явсан дээрэмчнээс Дундад болон Баруун Азийг чичрүүлсэн эзэнт гүрнээ байгуулсан Доголон Төмөр хаан, ах дүү монголчуудаа нэгтгэх гэж ХХ зууны эхэнд хүчирхэг Дундад иргэн улсын эсрэг зэвсэг барин тэмцсэн монголчууд, Өвөр Монголоо тусгаар улс болгохын төлөө Японы Квантуны армитай хамтран ажилласныхаа төлөө хүүгээ цаазлуулж, өөрөө насны эцэс хүртэл гянданд суусан Дэмчигдонров вангийн гунигт түүх, Алтайн казахуудын улс байгуулах гэж тэмцэлдэж яваад баригдаж цаазлуулсан Оспан баатар гээд өрлөг түүхийн баларсан, мартагдсан хуудаснуудыг эргүүлэн, эрхэм уншигч танаа толилуулж байна.

Монголын гээгдсэн түүх (3 бүтээлт цуврал)